Ватикан Хитой Халқ Республикаси (ХХР) ҳукуматига Рим папаси Франциск ва Хитой етакчиси Си Цзиньпин ўртасида учрашув ташкиллаштиришни таклиф қилган, чунки ўша пайти иккала етакчи ҳам Қозоғистонда бўлган. Бироқ Пекин таклифни рад этган. Бу ҳақда Reuters Ватикандаги манбасига таяниб хабар берди.
Манбага кўра, учрашиш ташаббуси Рим папасидан чиққан, аммо Хитой томони «бундай таклифни қадрлашини» айтиб, афсуски, Си Цзиньпиннинг графигида бўш вақт йўқлигини маълум қилган. Улар бунгача ҳам ҳеч қачон юзма-юз учрашмаган.
Папа Франциск ва Си Цзиньпин иккаласи ҳам 14 сентябрь, чоршанба куни Нур-Султонда эди. Си Цзиньпин у ерга расмий ташриф билан борган, Рим папаси эса Дунёвий ва анъанавий динлар етакчиларининг VII қурултойида қатнашган.
Қозоғистонга келиб, республика президенти Қосим-Жўмарт Тўқаев билан учрашганидан кейин Рим папаси «Қозоғистон концерт залида ҳукумат, фуқаролик жамияти ва дипломатик корпусга мурожаат қилди. «Ўзаро зиддиятда бўлган блоклар душманлигини чуқурлаштирмаслик ва уларни кучайтиришни тўхтатишни ўрганиш вақти келди. Бизга шундай етакчилар керакки, улар янги авлодлар ҳақида қайғуриб, халқаро даражада халқлар ўртасида ҳамжиҳатлик ва мулоқотга имконият ярацин, «Хелсинки руҳи», мултилатерализмни мустаҳкамлашга интилишни қайта тикласин, янада барқарор ва хотиржам дунёни қурсин», — деди Франциск.
Си Цзиньпин коронавирус пандемияси бошланганидан буён илк турнеси доирасида Қозоғистонга 14 сентябрь куни етиб келди. У Тўқаев билан музокаралар ўтказди, шундан кейин Қозоғистоннинг олий давлат мукофоти — «Алтин Киран» ордени билан тақдирланди.
Изоҳ (0)