Рим папаси Ватиканнинг “Украинадаги махфий тинчликпарварлик миссияси”даги иштироки ҳақида гапирди

Рим папаси Франциск Ватикан Украинадаги тинчликпарварлик миссиясида қатнашишга, шунингдек, босиб олинган ҳудудлардан Россияга мажбуран олиб кетилган болаларни ватанига қайтаришда иштирок этишга тайёрлигини айтди.

Reuters мухбири Рим-католик черкови раҳбари билан самолёт бортида гаплашишга муваффақ бўлган — Франциск Венгрияга амалга оширган уч кунлик ташрифидан кейин Ватиканга қайтаётган эди.

Рим папаси, хусусан, мақсади жанговар ҳаракатларни тўхтатиш бўлган Ватикан иштирокидаги тинчликпарварлик миссияси ҳақида гапирган, бироқ у ҳозирча тафсилотларни сир тутиши кераклигини таъкидлаган.

Францискка кўра, у Украинада уруш масаласини Венгрия президенти Виктор Орбан ва митрополит Илларион билан ҳам муҳокама қилган. Рим-католик черкови раҳбари мазкур музокара тафсилотларини ошкор этмаган.

Шунингдек, Рим папаси Ватикан Россияга олиб чиқиб кетилган украин болаларини уйига қайтаришда иштирок этишга тайёрлигини билдирган. “Биз инсон қўлидан келиши мумкин бўлган барча ишни қилишимиз керак”, — дея қайд этган у.

Рим папаси Россия қўшинлари Украинага бостириб кирганидан буён томонларни можарони тўхтатишга чақириб келади. 2022 йил октябрда у Рим папаси Франциск Россия ва Украина президентлари Владимир Путин ва Владимир Зеленскийга урушга чек қўйишни сўраб мурожаат қилганди. Орадан кўп ўтмай  Макрон Рим папасидан Украинадаги вазиятни тартибга солиш учун Путин ва Байденга қўнғироқ қилишни сўраган эди.