88 yoshli Rim papasi Fransiskning sog‘lig‘i so‘nggi bir kecha-kunduz ichida yomonlashdi. Bu haqda Vatikan matbuot xizmati ma’lum qildi.
Unga ko‘ra, pontifik “davomli astmaga o‘xshash nafas qisishi”dan aziyat chekmoqda, shu sababli uni yuqori konsentratsiyali kislorod bilan ta’minlashga to‘g‘ri keldi. Bundan tashqari, Rim-katolik cherkovi rahbariga kamqonlik fonida qon quyish muolajasi o‘tkazildi.
Hozirgi paytda Fransiskning ahvoli hamon og‘irligicha qolmoqda, deya ta’kidladi Muqaddas taxt matbuot xizmati.
E’lon qilinganidek, Rim papasi hali ham “xavfdan xoli emas”. U 21-fevralga nisbatan kuchliroq og‘riqni his qilmoqda.
Kardinal Ravazi Fransiskning taxtdan chetlatilishini istisno etmadi
Avvalroq kardinal Janfranko Ravazi Corriere della Sera gazetasiga bergan intervyusida Fransisk o‘zining sog‘lig‘i tufayli vazifalarini bajara olmasa, xuddi o‘tmishdoshi Benedikt XVI kabi taxtdan voz kechishi mumkinligini istisno etmagan edi.
Agar papa Fransisk o‘z vazifalarini bajarishda qiyinchiliklarga duch kelsa, u o‘z tanlovini amalga oshiradi, dedi Ravazi.
Shu bilan birga, u Fransisk bu yil Rim-katolik cherkovi tomonidan nishonlanayotgan umidga bag‘ishlangan nasroniylikning yubiley yilini oxiriga yetkazishni xohlayotganini aytdi.
Bu uning uchun muhim, deya qo‘shimcha qildi kardinal.
Rim papasining kasalxonaga yotqizilishi
Rim papasi Fransisk joriy yilning 14-fevral kuni bir necha kunlik nafas olishdagi qiyinchilikdan so‘ng yengil isitma bilan Rimdagi kasalxonaga yotqizilgan. Yoshligida o‘pkasining bir qismi olib tashlangan pontifik bir haftadan buyon nafas olish bilan bog‘liq muammolardan aziyat chekmoqda. 18-fevral kuni unga ikki tomonlama o‘pka yallig‘lanishi tashxisi qo‘yilgani ma’lum bo‘ldi.
2023-yilning mart oyida u bronxit tufayli shifoxonada uch kecha o‘tkazdi. Sog‘lig‘idagi muammolarga qaramay, Fransisk rasmiy uchrashuvlarda qatnashishni davom ettirdi, hatto chet ellarga uzoq safarlarga chiqdi.
2024-yil sentyabr oyida u 12 kun sayohat qilib, Osiyoning jami 4 ta mamlakatiga tashrif buyurdi. Davomiyligi va masofasi nuqtayi nazaridan bu safar uning deyarli 12 yillik faoliyati davomidagi eng uzoq sayohat bo‘ldi.
Izoh (0)