Россия президенти Владимир Путин Чеченистон раҳбари Рамзан Қодировнинг қизи Айшат Қодировани II даражали “Ватан олдидаги хизматлари учун” ордени билан тақдирлади. Тегишли фармон ҳуқуқий ахборотнинг расмий интернет порталида эълон қилинди.
Ҳужжатга кўра, 24 ёшли Қодирова бир қанча одамлар қатори “миллий маданият ва санъатни ривожлантиришдаги хизматлари, кўп йиллик самарали ижодий фаолияти учун” тақдирланган.
Айшат Қодирова 2021 йил октябридан буён Чеченистон маданият вазири лавозимида ишлаб келмоқда. Бунгача у бир йил Чеченистон Маданият вазирлиги раҳбарининг биринчи ўринбосари сифатида фаолият олиб борган.
Давлат хизматидан олдин у Firdaws islom модалар уйини уч йил бошқарган. Шу вақт ичида Айшат
- “Чеченистон олдидаги хизматлари учун” медали;
- “Инсон ҳуқуқларини ҳимоя қилгани учун” медали;
- “Аъло меҳнати учун” фахрий нишони;
- Чеченистонда хизмат кўрсатган маданият ходими унвони;
- Қодиров ордени — республиканинг олий мукофоти билан тақдирланган.
Рамзан Қодиров ва унинг оиласи мунтазам равишда тақдирланиб келади.
Чеченистон раҳбарининг қариндошлари қандай мукофотлар олган?
Рамзан Қодировнинг қариндошлари худди ўзи каби мунтазам равишда минтақавий ва федерал мукофот ва унвонлар олади.
- 2022 йил ноябрда Путин Чеченистон раҳбарининг рафиқаси Медни Қодировага “Қаҳрамон она” унвонини берган.
- 2023 йил февралда Қодировнинг ўзи биринчи “Чеченистон Қаҳрамони” бўлди (бу унвонни унинг ўзи таъсис этган) ва март ойида у “Чеченистонда хизмат кўрсатган инсон ҳуқуқлари ҳимоячиси” медалини олди.
- Июнь ойида Чеченистон раҳбарининг 20 ёшли қизи Хутмат “тиббиёт ривожига қўшган улкан ҳиссаси” учун республиканинг олий ордени билан тақдирланган эди.
- Путин Чеченистон раҳбарининг 26 ёшли жияни Ҳамзат Қодиров “Ватан олдидаги хизматлари учун” II даражали ордени билан тақдирлаганди. У “фаолиятидаги муваффақиятлар ва кўп йиллик виждонли меҳнати учун” мукофотланган.
BBC рус хизматининг 2018 йилда ҳисоб-китобларига кўра, Чеченистондаги 158 нафар юқори мартабали амалдорнинг 30 фоизи республика раҳбарининг қариндошлари, 23 фоизи қишлоқдошлари, яна 12 фоизи Чеченистон раҳбарининг дўстлари ва уларнинг қариндошларидир.
“Қариндошларимнинг ҳар қандай муассаса ва ҳар қандай лавозимдаги талаби ўн баробар кўп, чунки улар менга қарамай ишлашларини исботлаши керак. Кимга ишонсам, ўшани тайинлайман”, — деган эди Қодиров бу борада.
Изоҳ (0)