Checheniston rahbarining katta qizi Ayshat Qodirova “Checheniston birinchi prezidenti Ahmad-Hoji Qodirov xotirasiga” medali bilan taqdirlandi. Ushbu mukofot haqida mahalliy “Grozniy” telekanali xabar berdi.
Qodirovaga mazkur medal Checheniston va bosib olingan Donbass “hududlari o‘rtasidagi hamkorlikni mustahkamlagani” uchun berilgan. Mukofotni unga otasi Ramzan Qodirovning o‘zi topshirgan. 2023-yilning oktyabrida u 24 yoshli Ayshatni Checheniston hukumatining ijtimoiy masalalar bo‘yicha rais o‘rinbosari lavozimiga tayinlagandi.
Bu Qodirovaning ilk mukofoti emas. 2024-yil fevral oyida u o‘zini o‘zi “Donets xalq respublikasi” deb atagan hududning ordeni bilan taqdirlangandi. Mukofotga izohda Qodirova ushbu hududga “gumanitar missiya bilan borib, frontdagi chechen jangchilaridan xabar olgani va ehtiyojmand aholi uchun yordam delegatsiyalarini yuborgani” aytilgan.
2020-yil mart oyida Qodirova “Milliy madaniyat va san’at rivojiga qo‘shgan hissasi” uchun otasidan “Checheniston oldidagi xizmatlari uchun” medalini olgandi. Shuningdek, Ayshat Checheniston rahbarining rafiqasi Medni Qodirova asos solgan “Firdaws” moda uyiga rahbarlik qiladi.
2020-yil yozida Ayshat Qodirova otasiga nisbatan inson huquqlari buzilishi, jumladan qiynoqlar va sudsiz qatl etishlar sababli joriy qilingan AQSH sanksiyalari ta’siriga tushgandi. 2021-yil dekabr oyida o‘sha paytda Checheniston madaniyat vaziri lavozimida ishlagan Qodirova otasidan “Inson huquqlarini himoya qilgani uchun” medal olgan.
Izoh (0)