Япония Россиянинг 80 дан ортиқ фуқароси ва тўққизта ташкилотига нисбатан санкциялар жорий қилди. Бу ҳақда Япония Молия вазирлиги маълумотларига таяниб, «РБК» хабар берди.
Япония санкциялари остига Чеченистон раҳбари Рамзан Қодиров, Россия Мудофаа вазирлиги раҳбари Сергей Шойгу, бош вазир Михаил Мишустин ва Хавфсизлик кенгаши раиси ўринбосари Дмитрий Медведевнинг оила аъзолари тушган. Жумладан:
- Рамзан Қодировнинг қизлари Айшат Қодирова (Чеченистон маданият вазири), Хадижат Қодирова (Грозний мактабгача таълим бошқармаси бошлиғи) ва Табарик Қодирова;
- Рамзан Қодировнинг рафиқаси Медни Қодирова;
- чечен гўзаллик танловлари иштирокчиси Фотима Хазуева ва қўшиқчи Аминат Аҳмадова (улар Қодировга яқин доирада деб ҳисобланади);
- Сергей Шойгунинг рафиқаси Ирина Шойгу, қизлари Ксения Шойгу (Россия триатлон федерацияси президенти) ва Юлия Шойгу (Фавқулодда вазиятлар вазирлигининг Шошилинч психологик ёрдам маркази директори);
- Михаил Мишустиннинг рафиқаси Владлена Мишустин, ўғиллари Алексей ва Александр Мишустин;
- Дмитрий Медведевнинг рафиқаси Светлана Медведева ва ўғли Иля Медведевга қарши санкциялар жорий қилинган.
Россиянинг Украинадаги босқини бошланганидан сўнг, Япония Россияга қарши бир нечта санкциялар пакетини жорий қилди, бу, хусусан, жисмоний шахслар, компаниялар, банк сектори, шунингдек, экспорт ва импортга таъсир кўрсатди.
Мамлакат, хусусан, Россиядан кўмир, автомобиллар, ароқ ва айрим турдаги ёғочларни импорт қилишни тақиқлади. Бундан ташқари, Токио Россияга «саноат инфратузилмасини мустаҳкамлашга ёрдам берадиган» маҳсулотлар: пўлат баклар, конвеерлар, самосваллар, бульдозерлар, дастгоҳлар ва бошқаларни экспорт қилишни тақиқлади.
Изоҳ (0)