Покистонда минглаб фуқаролар мамлакат собиқ бош вазири Имрон Хоннинг озод этилишини талаб қилиб, намойишлар бошлаб юборди. Бу ҳақда Al Arabiya нашри хабар берди.
Манбада айтилишича, қамоқдаги собиқ бош вазирнинг минглаб тарафдорлари 5 август куни мамлакатнинг шимоли-ғарбий қисмида Имрон Хон ҳибсга олингани бир йиллиги муносабати билан намойишлар ташкил этган. Намойишга йиғилганлар собиқ раҳбарнинг озод қилинишини ва сиёсий фаолиятга қайтарилишини талаб қилган.
Норозилик намойишлари Имрон Хоннинг “Адолат партияси” уюшмаси томонидан ташкил этилган. Бу ҳаракатдан мақсад бош вазир Шаҳбоз Шариф ҳамда унинг ҳукуматини ён беришга мажбур қилиш эканлиги айтилган.
Имрон Хонни қўллаб-қувватлаган намойишлар Хайбер-Пахтунхва вилоятига қарашли Сваби шаҳрида ўтказилган. Ушбу вилоятнинг кўпчилик аҳолиси ҳозирги ҳукуматдан норози ҳамда Имрон Хон ҳокимиятга қайтишини истайди.
Сваби шаҳрида намойишлар доирасида 10 000 нафардан ортиқ намойишчилар йиғилган. Маҳаллий ҳукумат вакиллари норозилик кўлами кучайиб кетмаслиги учун Имрон Хон тез фурсатда озод қилинишига ваъда берган.
Хайбер-Пахтунхва вилояти раҳбари Амин Гундапур намойишчилардан кейинги ҳафталарда Исломободга юришга тайёрланишни сўраган. Чунки “Адолат партияси” келаси ой бошида пойтахт Исломободда катта норозилик намойиши ўтказишни режалаштирмоқда.
Маълумот ўрнида, Имрон Хон 2023 йилнинг 5 августида Исломобод суди томонидан коррупция айблови бўйича 3 йиллик қамоқ жазосига ҳукм қилинган эди. Айблов Имрон Хоннинг партиядаги етакчилигига якун ясай олмади, халқ қўллови давом этди.
Изоҳ (0)