Статистика агентлиги 2025 йил январь ойидаги саноат ишлаб чиқариш ҳажми бўйича маълумотларни очиқлади.
Унга кўра, ишлаб чиқарадиган саноат таркибида озиқ-овқат, ичимликлар ва тамаки маҳсулотларини ишлаб чиқаришнинг улуши 18,5 фоиз, кимё маҳсулотлари, резина ва пластмасса буюмларини ишлаб чиқаришнинг улуши 7,3 фоизни ташкил этди.
Рақамларда келтирилишича, 2025 йилнинг январида пиво ишлаб чиқариш ҳажми 22,1 фоизга қисқарган. Ўтган йилнинг январида эса кўрсаткич қарийб 90 фоизга ошганди.
Uzum виноси ишлаб чиқариш ҳажми эса 60 фоизга пасайган. 2024 йилнинг январида кўрсаткич 26,9 фоизга ошган эди.
Тамаки маҳсулотларининг ҳажми 15,7 фоизга тушган. Эътиборга молик томони, ўтган йилнинг мос даврида кўрсаткич 8 фоизга ошган эди.
Шу билан бирга, 2025 йилнинг январь ойида республикада 99 минг тонна автомобиль бензини, 58,3 минг тонна ип калава, 8,3 млн литр пиво маҳсулотлари ҳамда 65,6 минг тонна юмшоқ буғдой ва спелта уни ишлаб чиқарилган.
Аввалроқ Ўзбекистонда 56,3 мингта саноат корхоналари фаолият юритаётгани ҳақида хабар берилганди. Январь ойида бир неча муҳим саноат маҳсулотларини ишлаб чиқариш ҳажми сезиларли қисқаргани айтилганди.
Буни, масалан, доимий камайиш трендига ўтган табиий газни қазиб олиш бўйича рақамлардан кўриш мумкин. Ўтган ойда 3 млрд 875 млн метр куб газ қазиб олинган. Таққослаш учун, 2024 йил январдаги натижалар 3 млрд 994 млн метр куб эди
Изоҳ (0)