Канада Россияга қарши янги санкциялар киритиб, ҳашамат ва зеб-зийнат буюмларини мамлакатга олиб кириш ва у ердан олиб чиқишни тақиқлади. Шунингдек, Оттава санкциялар рўйхатини кенгайтириб, унга 14 нафар россияликни қўшди, деб ёзади «РБК».
«Канада Россия ҳашамат буюмлари, шу жумладан, алкоголли ичимликлар, тамаки, баъзи турдаги тўқимачилик буюмлари ва люкс синфидаги спорт кийимлари, оёқ кийимлар, кийим-кечак ва аксессуарлар, қимматбаҳо тақинчоқлар, идиш-товоқлар ва санъат асарлари экспортини тақиқлайди», — дейилади Канада Ташқи ишлар вазирлиги хабарида. Россиядан алкоголли ичимликлар, денгиз маҳсулотлари, балиқ ва олмос олиб кириш тақиқланади.
Канада ҳукумати маълумотларига кўра, гап 75,7 миллион долларлик маҳсулотлар ҳақида бормоқда. Оттава қайд этишича, «Россия томонидан қурол ясашда қўлланилиши мумкин бўлган» товарлар экспорти ҳам ман қилинади.
Россияга коммуникация қурилмалари, чунончи, компьютерлар, мобил телефонлар, модемлар, принтерлар экспорти ҳам тақиқ остига олинди. Россияга киритилишига йўл қўйилмайдиган ҳашамат буюмлари қаторига пиво, вино, атир, кўз пардози учун воситалар, мўйнали тери, ипак матолар, гиламлар, мотоцикллар, автомобиллар, қўл соатлари, антиквариат кирди.
Канада ҳукумати таъкидлашича, чекловлар АҚШ ва Европадаги шериклар билан мувофиқлаштирилган ҳолда киритилмоқда. Евроиттифоқ ва АҚШ Россияга ҳашамат буюмлари экспортини март ойидаёқ тақиқлаган эди.
Мавзуга доир:
- Канада Путиннинг икки қизи, Лавровнинг оиласи ва россиялик бизнесменларга қарши санкциялар қўллаганини эълон қилди
- Евроиттифоқ Путиннинг қизлари ва «Комсомолская Правда» бош муҳарририга нисбатан санкциялар киритди
- АҚШ Россияга инвестиция киритишни тақиқлади ва «Сбербанк» ҳамда «Алфабанк»ка нисбатан санкциялар жорий қилди. Путиннинг қизлари ҳам АҚШнинг янги санкцияларига учраган
Изоҳ (0)