Кинотавсия: Тақдир синовлари олдида енгилмаган аёллар ҳақидаги 5 та фильм

Букилмас ирода, жасорат ва матонат билан тақдир зарбаларига дош бериб, қийинчиликларни енгиб ўтган аёллар ҳақидаги мазкур фильмларни томоша қилиб, кетган вақтингизга ачинмайсиз.

“Клико хоним”

Режиссёр: Томас К. Наппер

Француз аёл Барба-Никол Клико (Хейли Беннет) 20 ёшида турмушга чиқади ва 27 ёшида қўлида боласи билан бева қолади. Агар унинг 18-асрдаги бошқа тенгдошлари тақдирнинг бундай зарбасидан таслим бўлишса, Клико буни ўзига эп кўрмайди. У нафақат эрининг кўпикли вино бизнесини ўз қўлига олади, балки уни ривожлантиради ҳам. Кўпикли вино ишлаб чиқариш учун у жорий этган инновацион технологиялар бутун дунёни забт этади ва ҳозиргача ишлаб чиқарувчилар томонидан истисносиз фойдаланилмоқда. Ҳатто бир неча асрлар ўтган бўлса ҳам, дунё ҳали ҳам Клико номини олган брендни яхши билади. Фильм ўзига ишониш қанчалик муҳимлигини эслатиб туради.

“Элис Хартнинг йўқолган гуллари”

Режиссёр: Глендин Айвин

Ўтган йилнинг энг чиройли — мазмунли ва визуал сериалларидан бири. Фильмда даҳшатли ёнғинда бирваракайига ота-онасидан айрилган Элис исмли қиз ҳақида ҳикоя қилинади. Уни гуллар тилида қандай мулоқот қилишни биладиган флорист ва ботаник бувиси Жун қарамоғига олади. У Элисга ҳам бу сирни ўргатади. Вақт ўтиши билан Элис ота-онасининг никоҳи ҳавас қиларли эмаслигини билиб олади — отаси қизни ва унинг онасини мунтазам равишда калтаклаган. Уларнинг ҳаётига зомин бўлган ёнғин эса тасодифан бўлмаган.

Сериал ҳал қилинмаган травмалар қандай оқибатларга олиб келиши ҳақида. Аммо шу билан бирга, қаҳрамон Льюис Керролл эртагидаги Алиса сингари озод бўлишга муваффақ бўлади ва ўтмиш билан келишиб, келажакка янги куч билан қадам қўяди.

“Аёллар сирлари”

Режиссёр: Родриго Гарсия

Алехандро Инярритунинг дастлабки фильмини эслатувчи, унча машҳур бўлмаган аммо ҳайратланарли картинаси.

“Аёллар сирлари” эпилог ва муқаддима билан беш қисмдан иборат бўлса-да, қаҳрамонлар тақдири бир-бирига боғлиқ. Улар турли муаммоларга дуч келишади: яқинларига қилинган хиёнат, ёлғизлик, режалаштирилмаган ҳомиладорлик ва у билан боғлиқ қўрқинчли танлов — аборт қилиш ёки болани сақлаб қолиш, фақат ўз кучига таяниш, шунингдек, яқин одамни йўқотиш қўрқуви.

Гленн Клоуз, Камерон Диас, Холли Ҳантер, Калиста Флокхарт ўйнаган қаҳрамонлар бошига тушган қийинчиликларни турли йўллар билан енгишади. Гарчи уларнинг муаммоларига бефарқ бўлмаган аёллардан ёрдам олишга муваффақ бўлишса ҳам, муаммоларга ечим топиш ўзларига қолади.

“Алмаштирилган бола”

Режиссёр: Клин Иствуд

Клинт Иствуднинг Анжелина Жоли иштирокидаги “Алмаштирилган бола” триллери реал воқеаларга асосланган. 1920 йиллар. Ёлғиз она Кристин Коллинзнинг ўғли номаълум босқинчилар томонидан ўғирлаб кетилади. Полициянинг ҳаракатсизлигидан чарчаган аёл воқеани оммага эълон қилади, бу эса ҳуқуқ-тартибот ходимларини ғазаблантиради. Натижада ишни тезроқ ёпишга қарор қилишади: улар бошқа бировнинг боласини онага қайтариб беришади ва стресс туфайли ўғлини таний олмаётганликка ўжарлик билан ишонтиришади. Бу нарса иш бермагач, у руҳий касалхонага юборилади.

Экранда содир бўлаётган воқеалар ҳақиқатда содир бўлганига ишониш қийин. Болалар ва уларнинг ота-оналарига нисбатан зўравонлик, жазоловчи психиатрия, порахўр ҳокимиятнинг ҳаракатсизлиги ва катта қайғуга дуч келган кичик одамнинг тақдири. Бу ҳикоя Голливуд фильмларидек бахтли якунга эга эмас.