Тошкент шаҳрининг Янгиҳаёт туманида Ички ишлар вазирлигининг ҳарбий хизматчилари учун қурилаётган янги уйлардан хонадон харид қилган 151 киши айни кунга келиб, сарсон-саргардон бўлмоқда.
“Дарё”га мурожаат қилувчиларнинг айтишича, 2024 йилнинг апрель ойида фойдаланишга топширилиши керак бўлган уйларнинг қурилиши ҳамон чўзилмоқда. Битмаган. Ички ишлар вазирлиги қошидаги қоровул қўшинлари масъуллари вазиятга томошабин бўлишдан, қурувчи эса пулим тугади дейишдан нарига ўтмаяпти.
Давлат бизга Ички ишлар вазирлиги орқали 69 миллион сўмдан пул бериб, уйнинг бошланғич бадал тўловини тўлаб берганди. Хонадонларнинг квадрат метри ҳар хил бўлгани учун етмаган пулни ўзимиз тўлаганмиз. Натижада уй нархининг 25 фоизи шакллантирилган. Тан олишимиз керак пулни тўлашимиздан олдин қурувчи уй биносини кўтариб бўлган эди. Бизга берилган ваъда ва шартнома шартларига кўра уй қурилишининг кечиктирилиши ҳисобга олинганда битиши 2024 йилнинг апрель ойи эди. Лекин мана кўриб турганингиздек 2024 йилнинг август ойида ҳам уй тайёр эмас, дейди нафақадаги хизматчи Обид Шерматов.
Мурожаатчиларнинг айтишича, уй қурилишига бел боғлаган қурувчи айни кунга келиб, пули тугаганини важ қилиб, уйни фойдаланиш учун тайёр ҳолатга келтирмаяпти.
Қурувчи пулим йўқ, пул тўланглар кейин қурилишни давом эттираман деяпти. Биз эса банкдан кредит ололмаяпмиз. Кадастри йўқ уйга банк ипотека кредити бермаяпти. Ўзимиз ёнимиздан тўлайлик десак, олаётган нафақамиз уй ижараси ва рўзғорга кетяпти. Орттиролмаяпмиз. Уйимиз қурилишига бош-қош бўлаётган Ички ишлар вазирлиги қошидаги қоровул қўшинлари масъуллари эса уйнинг бошланғич тўлови тўлаб берилган, қолганини уйни қабул қилиб олгач, ойма-ой тўлайсизлар дейишмоқда, дейди мурожаатчи.
Ички ишлар вазирлигининг собиқ хизматчилари учун қурилаётган уй Comfort Construction МЧЖ томонидан олиб борилаётган бўлиб, бу қурилиш ҳақидаги шартнома ҳарбий қисм ва қурувчи ўртасида 2021 йил 110-рақами билан имзоланган.
Қурувчи маблағим йўқ, тугаб қолди деган сабабни айтиб, уй қурилишини тўхтатиб қўйган. Аслида бунақа катта ишни пули бор, маблағи тугаб қолмайдиган қурувчилар олиши керакмасми? Тендерда шунга эътибор қаратилган бўлиши керак-ку. Хўш, маблағи йўқ экан, нега унда бирданига 4 та уйнинг асосий биносини кўтарди. Аввал битта уйни қуриб, кадастр ҳужжатини олиб, одамларга топширгач, пулини олиб, қолганини ҳам шу тартибда қурмайдими?, дейди Обид Шерматов.
“Дарё” журналисти саволларига жавоб берган Comfort Construction МЧЖ таъсисчиси Суюн Раҳмонов айни кунга қадар ўз маблағлари ҳисобидан 50 миллиард сўмдан ортиқ чиқим қилганини, аммо Ички ишлар вазирлиги қошидаги қоровул қўшинлари масъуллари айтилган ваъдани бажаришмаганини таъкидламоқда.
Ички ишлар вазирлигининг қоровул қўшинлари ҳарбий хизматчиларига уй қуриш мақсадида тендерга кириб, 1,1 гектар майдонга 4 та кўп қаватли уй қуриш имкониятини қўлга киритганмиз. 2021 йилнинг апрель ойида қоровул қўшинлари билан 110-сонли шартнома имзолаб, шартларимизни кўрсатганмиз. Шартномага кўра, хонадон олмоқчи бўлган фуқаролар уйнинг бошланғич тўловини бир ой муддатда тўлаб, қолганини ишнинг боришига қараб босқичма-босқич тўлаб боришлари керак эди. Лекин бизга бошланғич тўлов суммаси ҳам бўлиб-бўлиб, 2022 йилнинг ноябрь ойида тўлаб берилди. Ҳозирга қадар 110-сонли шартнома шарти қоровул қўшинлар масъуллари томонидан тўлиқ бажарилмади, дейди қурувчи.
Суюн Раҳмоновнинг билдиришича, янги қурилаётган 4 та кўп қаватли уйда 173 та хонадон бўлиши белгиланган. Қоровул қўшинлари 2024 йилнинг май ойигача бўлган муддатда фақатгина 155 кишининг уйи учун бошланғич тўловни амалга оширган. Қолган 18 нафар кишининг ҳатто исм-фамилияси ҳам берилмаган.
Қурилиш тўхтаб қолишига асосий сабаб бу эмас. Биз дастлабки 110-шартномада бошланғич тўловдан ташқари, қурилиш давомида ойма-ой пул тўлаб берилиши кераклигини айтганмиз ва шунга келишганмиз. Қоровул қўшинлари масъуллари уй қурилишини бошланг, қурилиш давомида сизга кредит олишда ёрдам берамиз дейишганди. Аммо олиб беришмади. Бизга дастлабки 25 фоизлик бадал тўловини тўлагунча 2 та уйнинг том қисмини ҳам ёпиб бўлгандик. Шартнома шартлари биз томондан бузилмаган, дейди Суюн ака.
Қурувчининг айтишича, айни кунда муаммонинг ечими хонадон эгаларининг ипотека кредити расмийлаштириб, тўловни амалга оширишига боғлиқ.
Уйнинг кадастр ҳужжати бўлмаса биз банкдан қандай қилиб ипотека кредити оламиз. Пулни қаерга тўлаймиз? Марҳамат бизга кадастр қилиб беришсин, биз тўловни қилишни бошлайлик. Шахсан мен банкка бордим, ҳозир кредит бермаймиз дейишяпти. Пулимиз бўлса тайёр уй олардик, пулимиз йўқлиги учун кредит оляпмиз, дейди Баҳринисо Холиқова.
Қурувчи Суюн Раҳмоновнинг маълумот беришича, у айни пайтда шу 4 та уй қурилиши учун хонадонлар учун тўлаб берилган 10-12 миллиард сўмдан ташқари ўз маблағлари ҳисобидан яна 50 миллиард сўмдан ортиқ маблағ сарфлаган. Айни кунда 4 та домнинг камчиликлари битиб, кадастрга тайёр бўлиши учун яна 10 миллиард сўмдан ортиқ маблағ зарур.
Уй битишининг кечикиши шахсан менга катта зарар бўляпти. Шу иморатларга тикилган пулим музлаб ётибди. Сизларга шартнома қилинган пайтда уйнинг квадрат метрини 3 миллион 990 минг сўмдан ҳисоблаб берганмиз. Ҳозир тан нархнинг ўзи 6 миллион сўмдан ошяпти, дейди қурувчи мурожаатчилар саволига жавоб берар экан.
Шавкат Аббосов исмли собиқ ҳарбий хизматчининг айтишича, бу ердан хонадон харид қилганларнинг аксарияти ҳозирги кунда ижарада яшайди. Олаётган пенсияси ижарага, янги уй тўловига ва яшашига етмайди.
Бу уй ҳали бери битмаса керак. Уйнинг кадастр ҳужжати чиқса, биз ҳам тўлов қиламиз. Лекин кадастрсиз қандай тўлов қиламиз, дейди бошқа мурожаатчи Темур Алтаев.
“Дарё” журналисти юзага келган ҳолат юзасидан Ички ишлар вазирлиги, шунингдек вазирлик қошидаги қоровул қўшинлари масъуллари билан суҳбатлашиб, вазиятга аниқлик киритишга уринди. Бироқ Ички ишлар вазирлиги ахборот хизмати раҳбари Шоҳрух Ғиёсов бу борада журналистнинг саволига фақат ёзма тарзда мурожаат қилинсагина жавоб беришини билдирди.
Изоҳ (0)