O‘zbekistonda yangi quriladigan uylarni markazlashtirilgan isiqqlik ta’minoti tizimiga ulash orqali aholi turar joylarida elektr energiyasidan oqilona foydalanishga o‘tish rejalashtirilmoqda. Bu prezidentning 21-fevraldagi farmoni bilan tasdiqlangan “yo‘l xaritasi”da ko‘zda tutilgan.
Unga ko‘ra, 2025-yilda quriladigan 135 mingta kvartirali uy-joylarni markazlashgan issiqlik ta’minotiga ulash rejalashtirilgan. Bunda xavfsizlik nuqtai nazaridan xonadonlarning oshxonasi elektr plitalari bilan jihozlanishi nazarda tutilgan.
Aholi yashash punktlaridagi ichki yo‘lllarni yoritish uchun elektr energiya sarfini ikki karra qisqartirish ham rejalashtirilgan. Tegishli takliflar 2025-yil 1-aprelgacha prezident administratsiyasiga taqdimot qilinishi kerak.
Respublikaning har bir hududida kamida ikkitadan liftlarni qabul qilish va xizmat ko‘rsatish guruhlari tashkil etiladi. Sohani zarur mutaxassislar bilan ta’minlash uchun respublikaning har bir hududida kamida 20 kishini liftlarga xizmat ko‘rsatish va ta’mirlash bo‘yicha o‘qitish yo‘lga qo‘yiladi.
23-yanvar kuni prezident raisligida bo‘lib o‘tgan videselektor yig‘ilishida 18 ming xonadon gazda individual isitiladigan qilib qurilgani uchun foydalanishga qabul qilinmay turgani aytilgandi. Mutasaddilarga ishchi guruhi tuzib, har bir holatni o‘rganib, masalaning yechimi bo‘yicha hukumatga taklif kiritish topshirildi. Bu yil 135 ming xonadonli ko‘p qavatli uylarni markazlashgan holda isitiladigan, ovqat pishirish esa elektr plitasi orqali bo‘ladigan qilib qurish zarurligi qayd etilgandi.
“Yangi quriladigan uylarda energiya manbasi sifatida faqat elektr energiyasini rag‘batlantirish taklifini qo‘llab-quvvatlaymiz”, degan edi Alisher Qodirov.
Qurilish vazirligining “Gazeta.uz”ga ma’lum qilishicha, Qoraqalpog‘iston, viloyatlar va Toshkent shahrida 2025-yilda ko‘p qavatli uylarda 120 ming xonadon qurish rejalashtirilgan.
Prezidentning 2021-yil 9-dekabrdagi “Yangi O‘zbekiston” turar joy massivlarini tashkil etish to‘g‘risidagi farmoniga asosan 29 ming xonadon markazlashtirilgan isitish tizimi bilan ta’minlanadi.
Yangi Toshkentda 15 ming xonadon bir vaqtning o‘zida elektr energiyasi, issiqlik va sovuqlik ishlab chiqaradigan trigeneratsiya tizimi orqali isitiladi va sovutiladi.
Uy-joyga talab yuqori bo‘lgan hududlarda 91 ming xonadon quriladi. Markazlashtirilgan isitish tizimiga ega hududlarda joylashgan yangi binolar shahar qozonxonalariga ulanish uchun texnik shartlarni oladi. Markazlashtirilgan issiqlik ta’minotiga ulanmagan hududlarda yangi qozonxonalar quriladi.
Qurilish vazirligi markazlashtirilgan qozonxonalarning afzalliklari sifatida yoqilg‘idan foydalanishda moslashuvchanlik (tabiiy gaz, ko‘mir, mazut), xavfsiz va barqaror issiqlik ta’minoti, yakka tartibdagi qozonlardan ikki baravar kam gaz sarfini aytdi.
Shavkat Mirziyoyev barcha hududlarda yangi qurilayotgan ko‘p qavatli uylarni bosqichma-bosqich “yashil energiya” uylariga aylantirish muhimligini ham taʼkidlagandi. Buni rag‘batlantirish maqsadida quriladigan uy-joyni energiya bilan taʼminlash uchun quyosh elektr stansiyalari bilan shartnoma tuzgan developerlarga bunday uylar uchun foyda solig‘i olinmaydi, kredit stavkasi 2 foiz arzon qilib beriladi. Natijada developerning xarajati kamayadi, undan uy olgan odamlarga esa elektr arzonroq bo‘ladi.
Izoh (0)