Тошкент шаҳрида Озарбайжон фуқароларидан ноқонуний тарзда пул талаб қилган Россия ва Озарбайжон фуқаролари ушланди. Бу ҳақда ИИВ Тезкор қидирув департаменти ахборот хизмати хабар берди.
Маълум қилинишича, 1983 йили Озарбайжонда туғилган шахс акаси билан бирга Бектемир туманида жойлашган бозорда цитрус меваларнинг савдоси билан шуғулланиб келган.
Ушбу шахс 10 январь куни, ИИВ Тезкор қидирув департаментига ариза билан мурожаат қилди. Унда ўзининг таниши бўлган Россия фуқароси билан 2024 йилнинг ноябрь ойларида вақтинча яшаш уйида меҳмондорчилик қилаётган вақтида улар орасида тушунмовчилик келиб чиққанлигини маълум қилган.
Шундан сўнг жиноий гуруҳ вакили 15 декабрь куни ўзининг жиноий шериги, 1974 йилда Озарбайжонда туғилган, муқаддам бир неча марта судланган шахсни Тошкентга чақиртирган.
Унинг ёрдамида жабрланувчига тазйиқ ўтказиб, шаънига айтилган гаплар учун жавоб бериши лозимлигини ва товламачилик йўли билан 5 минг доллар талаб қилган. Шундан 1,5 минг долларни 15 декабрь куни олиб кетган бўлса ҳам яна 3,5 минг долларни талаб қилиб келган.
10 январь куни Миробод туманида ўтказилган тезкор тадбир давомида, гумонланувчилар товламачилик йўли билан талаб қилиб келаётган, 3,5 минг долларни олаётган вақтида ушланди.
Ҳолат юзасидан Жиноят кодексининг 165-моддаси 2-қисм “в” банди (товламачилик бир гуруҳ шахслар томонидан олдиндан тил бириктириб содир этилган бўлса) билан жиноят иши қўзғатилди.
Уч нафар шахс Жиноят процессуал кодекснинг 227-моддаси (суриштирувчининг, терговчининг ёки прокурорнинг қарорига биноан ушлаб туриш) тартибида ушланиб, тергов ҳаракатлари олиб борилмоқда.
Изоҳ (0)