O‘zbekiston tumanidagi metan zapravka 792,5 mln so‘mlik gazdan noqonuniy foydalangani aniqlandi

O‘zbekiston tumanidagi metan gaz to‘ldirish shoxobchasida 792,5 million so‘mlik tabiiy gazdan noqonuniy foydalanish holati aniqlandi. Bu haqda “O‘zenergoinspeksiya” matbuot xizmati xabar berdi.

Inspeksiyaning  Farg‘ona viloyati hududiy boshqarmasi va Bosh prokuratura huzuridagi departament bilan hamkorlikda o‘tkazilgan nazorat tadbirida O‘zbekiston tumanidagi “F.M.” MCHJga qarashli avtomobillarga gaz to‘ldirish kompressor shoxobchasida o‘rnatilgan gaz hisoblagichga avtomatik o‘chirib yoqish qurilmasini o‘rnatib, tabiiy gazdan noqonuniy foydalanish holati fosh etilgan.

Ushbu qoidabuzarliklar natijasida davlat manfaatlariga 792,5 million so‘mlik (304,8 ming kub metr tabiiy gaz) zarar yetkazilgani ma’lum bo‘ldi.

Qoidabuzar isteʼmolchilarga nisbatan belgilangan tartibda choralar ko‘rilib, tegishli hujjatlar huquqni muhofaza etuvchi organlarga taqdim qilingan.