Сурхондарё вилоятининг Қизириқ туманида ҳоким ёрдамчиси 33 млн сўмлик кредитдан икки марта олиб бериш эвазига 4,5 млн сўм пора олаётганда ушланди. Бу ҳақда “Замон” дастурида хабар берилди.
Қизириқ туманидаги “Яккатерак” МФЙда ишлаган ҳоким ёрдамчиси фуқарога 33 млн сўмлик имтиёзли кредитдан икки марта (жами 66 млн сўм) олиб беришни ваъда қилган.
Бунинг эвазига ундан 4,5 млн сўм пора олган. Ўтказилган тезкор тадбирда ҳоким ёрдамчиси қўлга олинди.
Жиноят ишлари бўйича Қизириқ тумани суди ҳукмига кўра, айбланувчига Жиноят кодексининг 45-моддаси қўлланиб, 168-моддаси 3-қисми “в” банди (фирибгарлик хизмат мавқейидан фойдаланган ҳолда) билан 2 йилга ахлоқ тузатиш ишлари жазоси қўлланди.
Шунингдек, у раҳбарлик ва моддий жавобгарлик талаб этиладиган лавозимларида ишлай олмайди ва даромадининг 20 фоизи ушлаб қолинади.
Аввалроқ Тошкентнинг Учтепа туманида ҳоким ёрдамчиси 30 минг доллар олаётганида ушланганди.
Изоҳ (0)