Ўзбекистонда 2021 йил якунларига кўра, «Avtoraqam.uzex.uz» веб-сайти орқали 298,8 миллиард сўмлик 139,4 мингдан зиёд авторақамлар шаффоф онлайн аукционлар орқали сотилди. Бу ҳақда Республика товар-хом ашё биржаси хабар берди. Авторақамларнинг сотуви сон жиҳатдан 40 фоизга, ҳажми бўйича — 21 фоизга ўсган.
Маълум қилинишича, тузилган битта битимнинг ўртача қиймати 2,1 миллион сўмни ташкил этган. Сотилган авторақамларнинг 91 фоизи жисмоний шахслар, 9 фоизи эса юридик шахслар томонидан харид қилинган. Ўтган даврда сотилган авторақамларнинг энг паст баҳоси — 450,5 минг сўмни, энг қиммат авторақамнинг қиймати эса 441,5 миллион сўмни ташкил қилган.
Рақобатли савдолар натижасида битимларнинг 37 фоизи биринчи тоифадаги авторақамлар, 22 фоизи – иккинчи, 13 фоизи – учинчи, 9 фоизи – тўртинчи, 9 фоизи – бешинчи ва 10 фоизи – олтинчи тоифа авторақамларга тўғри келган.
Ҳудудлар кесимида энг кўп авторақамлар Тошкент шаҳри ва Тошкент вилояти (48 фоиз) Самарқанд ва Фарғона (8 фоиздан), Наманган ва Андижон (6 фоиздан) ҳамда Бухоро (5 фоиз) вилоятларида харид қилинган.
Эслатиб ўтамиз, авторақамларнинг онлайн аукционларда сотилишидан келиб тушган маблағларнинг 80 фоизи – давлат бюджетига, 20 фоизи – Ички ишлар вазирлигининг моддий-техник базасини ривожлантириш, ходимларини моддий рағбатлантириш ва бошқа харажатлар махсус жамғармасига йўналтирилади.
Аввалроқ онлайн аукционда 01 Q 001 QB автомобиль рақами қарийб 5 минг долларга сотилгани, Хоразмда 90 О 900 ОА авторақами учун онлайн аукционда кураш тонггача давом этгани тўғрисида хабар берилганди.
Изоҳ (0)