БМТнинг Яқин Шарқда тинчлик жараёни бўйича махсус координатори Тор Веннесленд Исроил–Фаластин можароси «қайнаш нуқтаси»га етиб бораётгани ҳақида огоҳлантирди. Тегишли баёнот ташкилот сайтида эълон қилинди.
Ташкилот расмийсининг баёноти Қуддус, Яҳудия ва Самарияда зўравонликлар авж олиши фонида эълон қилинди.
«Ўнлаб йиллар давом этган зўравонлик, ноқонуний аҳоли пунктларининг кенгайиши, ҳаракатсиз музокаралар ва чуқурлашиб бораётган ишғолдан сўнг, можаро яна қайнаш нуқтасига етди», — деди у.
Ўтган ҳафта Қуддусдаги портлашларда икки исроиллик ҳалок бўлган ва ўндан ортиқ одам яраланган. Бир неча кун олдин эса исроиллик кўчманчилар Хевронда фаластинликларга ҳужум қилган. Веннесленд мазкур ҳужумларни қораламоқда.
«Босиб олинган Фаластин ҳудудидаги зўравонликларнинг кучайиши тинчлик музокарасининг тўхтаб қолиши, Фаластин маъмурияти дуч келаётган иқтисодий ва институционал муаммоларнинг кучайиши шароитида юз бермоқда. Глобал тенденцияларнинг камайиши Фаластин халқи учун демократик янгиланишнинг етишмаслиги билан бирга муаммоларни янада кучайтирди», — дейди расмий.
Эскалация хавфи
БМТ вакилига кўра, яқинда фаластинлик «жангарилар» Исроилга қарата тўртта ракета отгани сабабли Ғазодаги «мўрт осойишталик» тўхтатилди. Бунга Исроил мудофаа кучларининг ҳаво ҳужумлари билан жавоб қайтариши сабаб бўлган.
«Яна бир бор эслатиб ўтамиз, жангарилар ҳаракати, заифлаштирувчи блокировкалар, қонуний Фаластин ҳукуматининг йўқлиги ва умидсизлик доимий равишда можаронинг кучайиш хавфини келтириб чиқаради», — таъкидлади Веннесленд.
Фаластин маъмурияти муаммолари
Айни пайтда Фаластин маъмурияти муҳим ва институционал муаммоларга дуч келмоқда. Сайловлар 2006 йилдан бери ўтказилмаган ва сайловчиларнинг ярмидан кўпи — 18 ёшдан 35 ёшгача бўлганлар — ҳеч қачон овоз бериш имконига эга бўлмаган.
«Минтақадаги динамика ва халқаро устуворликнинг ўзгариши Украинадаги уруш фонида содир бўлмоқда, бу эса ушбу можарога эътиборни сезиларли даражада камайтирди», — дейди БМТ вакили.
Сиёсий жараёнларда иштирок этиш
БМТ расмийсига кўра, ҳар икки томон ҳам тинчликка путур етказувчи бир томонлама ҳаракатларни, жумладан, аҳоли пунктларини кенгайтириш ёки қонунийлаштириш, бузиш ва кўчиришни тўхтатиши зарур.
У Фаластин иқтисодиётининг ўсиши учун имкониятлар яратиш, ҳаракат ва савдони яхшилашга чақирди.
«Охир-оқибат, фақат фаластинликлар ва исроилликлар биргаликда ўз келажагини белгилаши мумкин. Аммо БМТ ва халқаро ҳамжамият, жумладан, минтақавий ва халқаро тузилмалар орқали томонларни юқорида тамойиллар томон ҳаракатлантиришни қўллаб-қувватлаши керак», — дея хулоса қилган Тор Веннесленд.
Мавзуга доир:
Изоҳ (0)