Норвегиялик футболчи Эрлинг Ҳоланд 2022 йилда “Барселона”га ўтмоқчи бўлган.
Аввалроқ каталонияликлар “Манчестер Сити” ҳужумчисини 2025 йилда ўз сафига қўшиб олиши мумкинлиги хабар қилинганди.
“Барселона” аллақачон Ҳоландни ўз сафига қўшиб олиш учун ҳаракат қилиб кўрган. Роберт Левандовски “кўк-анорранглилар” футболчисига айланишидан олдин раҳбарият айнан норвегиялик ҳужумчининг отаси ва ўша вақтда унинг агенти бўлган Мино Райола билан алоқада бўлган. Улар 2021 йилнинг апрель ойида Барселонага борган ва клубнинг лойиҳаси билан танишган. Шундан сўнг Мадридга борган ва кейин “Манчестер Сити” базасига ташриф буюрган. Шунингдек, “Манчестер Юнайтед”, “Челси” ва “Ливерпуль” клублари базаларига ҳам боришган.
2021 йилнинг ёзида Лионель Месси “Барселона”ни тарк этган, аммо Ҳоланд “Боруссия Д”дан кетмаган. Эрлинг 2022 йилнинг ёзида Каталония клубига ўтишга розилик берган.
2022 йилнинг март ойида Хави Мюнхенга учган ва Ҳоланд билан юзма-юз кўришиб, лойиҳа, келажакдаги режалар ҳақида гаплашган. Бироқ, клубнинг жиддий молиявий муаммолари туфайли ушбу трансфер амалга ошмаган. Натижада “Барселона” Левандовскига эътиборини қаратиб, 45+5 миллион еврога ҳужумчини сотиб олган.
Ўша вақтдаги муваффақиятсизликка қарамасдан, “Барселона”нинг эшиги Ҳоланд учун ҳар доим очиқ. Февраль ойида клуб футболчининг агенти Рафаэла Пиментага яна бир бор таклиф билан чиққан. Агент “кўк-анорранглилар” спорт директори Деку билан учрашган.
Энди каталонияликлар 2025 йил ёзида Ҳоландни харид қилишга жиддий киришмоқчи.
Эслатиб ўтамиз, жорий мавсумда Ҳоланд барча турнирларда 34 та ўйинда қатнашиб, 29 та гол ва 6 та голли узатмани амалга оширди. Футболчининг клуб билан амалдаги меҳнат шартномаси 2027 йилнинг ёзига қадар тузилган.
Transfermarkt порталида келтирилган маълумотларга кўра, футболчининг бозор қиймати 180 миллион еврони ташкил қилади.
Изоҳ (0)