Панама президенти Хосе Рауль Мулино АҚШ давлат котиби Марко Рубио билан музокаралардан сўнг мамлакат “Бир макон — бир йўл” ташаббуси доирасида Хитой билан ўзаро англашув меморандумини давом эттирмаслигини айтди. Бу ҳақда PBS хабар берди.
Музокараларда Панама каналини АҚШ куч билан қайтариб олиши бўйича таҳдид қилинмаган.
“Лекин АҚШ президенти Дональд Трамп Хитойнинг канал ҳудудидаги мавжудлиги сув артериясини 1999 йилда Панамага топшириш тўғрисидаги шартнома шартларини бузади, деган қарорга келган. Чунки келишув каналнинг доимий нейтраллигини таъминлашни кўзда тутади”, деди Панама президенти.
Рубио Панама раҳбарига АҚШ президенти Хитойнинг минтақага таъсири остида Панама каналидаги статус-квони сақланиб қолишини истамаслигини айтди. У Панамадан Хитойнинг каналга таъсирини камайтириш чораларини кўришни талаб қилди. Акс ҳолда АҚШ икки давлат ўртасидаги канални эксплуатация қилиш тўғрисидаги шартномага мувофиқ зарур чораларни кўради.
“Менинг ҳукуматим 2017 йилги ъБир макон — бир йўлъ ташаббуси бўйича ўзаро англашув меморандумини узайтирмайди”, деган қарорга келди Хосе Рауль Мулино.
“Бир макон — бир йўл” Хитойнинг “Ипак йўли иқтисодий камари” ва “XXI аср денгиз ипак йўли” лойиҳаларини бирлаштириш бўйича 2013 йилда илгари сурилган ташаббусидир.
Мақсад — кўпроқ мамлакатлар иштирокидаги халқаро савдо-инвестиция лойиҳаларини фаоллаштириш ва манфаатдор давлатлар сармоясидан фойдаланиш, шунингдек, иқтисодий ҳамкорлик ва савдони кучайтириш учун инфратузилмани ривожлантириш.
“Бир макон — бир йўл” ташаббуси Жануби-Шарқий Осиё, Африка, Яқин Шарқ ва Европага товарларни тез ва арзон ташиш учун қуруқлик ва денгиз савдо йўлларини бирлаштиришни назарда тутади.
Изоҳ (0)