Пойтахт ҳавосининг ифлосланиш даражаси саломатлик учун зарарли дея баҳоланиб, шаҳар аҳолисига ниқобда юриш тавсия этилди.
Халқаро IQАir платформаси Тошкент шаҳрида ҳаво сифатини носоғлом, дея баҳолаб, пойтахт аҳолисига ташқарида машқ қилмаслик, ифлос ҳаводан сақланиш учун деразаларни ёпиш, ниқоб тақиш ҳамда ҳаво тозалагичларни ишга туширишни тавсия этди. Бу ҳақда Экология, атроф-муҳит муҳофазаси ва иқлим ўзгариши вазири маслаҳатчиси Расул Кушербаев ўз Telegram каналида хабар қолдирди.
Халқаро “Ҳаво сифати индекси” сайти айни вақтда Тошкент шаҳри ҳавосида ПМ 2.5 концентрацияси ЖССТ ҳаво сифатининг йиллик стандартидан 13,4 баравар юқорилигини кўрсатмоқда”,—деб ёзди у.
Аввалроқ 3 январь куни Тошкент шаҳри дунёнинг ҳаво сифати энг ифлос шаҳарлари рейтингида 4-ўринга чиққани хабар қилинганди. Бундай ҳавода шаҳар аҳолисига кўчада ниқоб тақиб юриш, деразаларни очмаслик, уй ичини намлантирувчи воситалар билан тозалаш тавсия этиб келинади.
Эслатиб ўтамиз, Тошкент 22 декабрь куни ҳам ҳавонинг ифлосланиш даражаси бўйича дунёнинг йирик шаҳарлари орасида 4-ўринга чиққанди.
Изоҳ (0)