Вадим Абрамов: Иккинчи голда ўйин қоидаси бузилмаганди. Бунга «Навбаҳор»нинг реакцияси мени ҳайрон қолдирди

«Бунёдкор» клуби бош мураббийи Вадим Абрамов Coca-Cola Суперлига 8-тури доирасида «Навбаҳор»га қарши кечган баҳсдан (3:1) сўнг ўз фикрлари билан ўртоқлашди.

«Ўйинда икки хил бўлимни кўрдик. Биринчи ва иккинчи бўлим умуман бошқача бўлди. Биринчи бўлимда учинчи голни ҳам киритишимиз мумкин эди. Афсуски, имкониятдан фойдалана олмадик. Иккинчи бўлимда эса рақиб ташаббусни қўлига олди. «Навбаҳор» сафида тажрибали йигитлар етарлича. Мана шундай вазиятда ҳам ўзларида куч топиб, учинчи голни кирита олган йигитларимизга миннатдорчилик билдирамиз.

Фикримча, мазкур учрашув ўтган йилги ўйинга ўхшаб кетди. Ўшанда ҳам биз биринчи бўлимда рақиб дарвозасини икки марта ишғол қилгандик. Танаффусдан сўнг мезбонлар бундан фарқли равишда икки марта жавоб қайтарганди. Якунда ғалабани илиб кетгандик. Бу ўйинда ҳам ҳисоб бошқачароқ бўлиши мумкин эди. Лекин ҳисоб 2:1 бўлиб турганида меҳмонлар эмас, биз гол урдик ва бу бизнинг омадимиз бўлди.

Иккинчи голдан олдин ҳеч қандай ўйин қоидаси бузилиши бўлмаганди. Рақиблар эътироз билдира бошлашганида ҳайрон қолдим. Балки ТВ орқали бу яхши кўрингандир. «Навбаҳор» бироз қўпол ўйнади, футболчимиз ҳам жароҳат олди. Унинг бурни синди. Иккинчи ўйинда ҳам жароҳат олмоқда. Бу ачинарли.

Албатта, «Навбаҳор» таркибида Ўзбекистон терма жамоасига номзод футболчилар бор. Уларни клубдаги ўйинидан келиб чиққан ҳолда жамоага таклиф қиламиз. Термизликлар сафида ҳам яхши йигитлар бор. Ҳозир уларнинг исм-фамилиясини айтиб ўтирмоқчи эмасман. Уларни кузатиб боряпман. Вақти келганида барчасини билиб оласиз. Умид қиламанки, пандемия тугаганида кимни кузатаётганимни билиб оласиз. «Навбаҳор»да мен кузатган футболчи бу ўйинда жуда яхши ҳаракат қилди», — дея Абрамовдан иқтибос келтиради «Championat.asia».

Мазкур ғалабадан кейин «Бунёдкор»нинг очколари 16 тага етди ва жамоа 3-ўринга кўтарилди.

Мавзуга доир: Андрей Канчельскис: Футболчиларим борини бериб ҳаракат қилмади