Coca-Cola kompaniyasi o‘z mahsulotlarini Belgiya, Buyuk Britaniya, Lyuksemburg, Niderlandiya, Fransiya va Germaniya bozorlaridan ommaviy ravishda qaytarib olmoqda. Bu haqda BBC xabar berdi.
Bunga ichimliklar tarkibida xloratlarning (kimyoviy modda) ko‘pligi sabab bo‘lgan. Kompaniya aniq raqamlarga ega emasligini aytgan, ammo gap do‘konlarda ham, savdo avtomatlarida ham sotiladigan katta miqdordagi tovarlar haqida ketmoqda. Choralar 2024-yilning noyabr oyi oxiridan buyon chiqarilgan banka va shishalardagi Coca-Cola, Sprite, Fanta, Fuze Tea, Minute Maid, Nalu, Royal Bliss va Tropico markalariga taalluqli. Muammo ichimliklar sifatini me’yoriy talablarga muvofiqligini tekshirish paytida aniqlangan.
“Faqat 328G dan 338G gacha ishlab chiqarish kodlari bo‘lgan bankalar va shishalar qaytarib olinishi lozim. Ishlab chiqarish kodini mahsulotning yaroqlilik muddati ostida topish mumkin”, deyiladi xabarda.
E’lon qilingan ma’lumotlarga ko‘ra, standartlarga javob bermaydigan mahsulotlarning aksariyati allaqachon muomaladan chiqarilgan yoki bozorlarga kiritilmagan. Qolgan partiyani olib qo‘yish bo‘yicha tashkilot yuqoridagi davlatlarning tegishli idoralari bilan hamkorlik qilmoqda.
Avvalroq Fransiyada olib borilgan tadqiqotlarda plastik baklajkalardagi Coca-Cola ichimligi tarkibida kamida 6 xil turdagi plastiklar aniqlangandi. Tadqiqotlar mikro va nanoplastiklarni aniqlashga ixtisoslashgan ikkita laboratoriyada o‘tkazilgan.
Olimlar Schweppes va Coca-Cola gazli ichimliklarni 1, 10 va 20 marta ochgandan so‘ng undagi mikroplastik zarrachalar miqdorini o‘lchagan. Natijada baklajkalar qopqog‘i qanchalik ko‘p ochilsa, gazli ichimlikka shunchalik ko‘p mikroplastik zarrachalar tushgan.
Coca-Cola munosabati
Schweppes va Coca-Cola kompaniyasi vakillari mazkur tadqiqotga munosabat bildirgan. Kompaniyalar ichimlik idishlarining barchasi oziq-ovqat mahsulotlari sifatiga qo‘yiladigan talablarga javob berishini va mikroplastika, “agar u aniqlansa ham qasddan idishga kiritilmasligini” bildirgan.
“Hozirgi kunda plastik zarralarni yutish inson salomatligi uchun muammo tug‘dirishiga oid ilmiy dalillar yo‘q”, deya ta’kidlagan qilgan Coca-Cola kompaniyasi.
Izoh (0)