«Металлург» клуби бош мураббийи Андрей Шипилов Coca-Cola Суперлига 9-тури доирасида ўтган «Сўғдиёна»га қарши ўйиндан (2:0) сўнг матбуот анжуманида қатнашди.
«Нима ҳам дейишим мумкин? Иккита ажойиб гол урдик ва дарвозамиз дахлсизлигини сақлаб қола олдик. «Сўғдиёна» билан ўйинга жиддий тайёрлангандик. Ўзига хос марказий ўйин деса ҳам бўлади. Жиззах жамоаси яхши шаклланган, агрессив футбол намойиш қилади. Таркибида маҳоратли футболчилар бор. Ҳа, «Насаф» билан ўйиндан кейин бироз кайфиятимиз тушди. Муҳими бу ўйинга яхши тиклана олдик. Ҳа, бироз хотиржам тўп тепдик. Майдон ҳолати ажойиб эди. Фақат майдонга чиқиб ютишимиз керак эди. Рақибга ҳеч қандай имконият қолдирмадик. Муҳим ва зарур бўлган уч очкони қўлга киритганимиз билан йигитларни табриклайман.
Икки ҳужумчи билан ўйнаганимиз нима билан боғлиқ? Ҳа, бу ўйинда шунақа форс-мажор ҳолатига тушиб қолдик. Саламат Қуттибоев эрталаб ўзини бироз ёмон ҳис қилди. Бошланғич таркибда шундай ўзгаришлар бўлиши рақиб учун кутилмаган ҳолат бўлган бўлиши мумкин.
Ўринбосарлар жамоаси? Мен бу ерда учинчи йил ишлашим. Ўринбосарлар жамоасидаги аксарият футболчилар асосий жамоа билан бирга шуғулланади. Йиғинларда, сафарларда биз билан бирга бўлади. Уларни орасида 2000, 2001 йилда туғилган футболчилар ҳам бор. Ҳали мавсум узун. Орада юзага келган танаффусда селекция ишларини олиб борамиз. 2003 ва 2004 йилда туғилган ўйинчиларни ҳам жалб қиламиз.
Даврон Анваровни аввалги турларда ҳам майдонга туширмоқчи эдим. Уни дебюти муваффақиятли чиққани билан табриклайман», — дея Шипилов сўзларини келтирмоқда «Championat.asia».
Мазкур ғалабадан кейин Андрей Шипилов шогирдларининг очколари 16 тага етди ва жамоа 3-ўринга кўтарилди. Жамоа келаси турда «Бунёдкор» меҳмони бўлади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)