Вадим Абрамов: «Локомотив»ни янада йирикроқ ҳисобда мағлуб этишимиз мумкин эди

Cоcа Cоlа Суперлига 6-туридан ўрин олган «Бунёдкор» — «Локомотив» (2:0) учрашувидан кейин ҳар икки жамоа бош мураббийлари иштирокида матбуот анжумани ўтказилди.

Дастлаб, «темир йўлчилар» устози Андрей Фёдоров ўйин ҳақидаги фикрлари билан ўртоқлашди.

«Учрашувнинг дастлабки 15 дақиқасида майдон эгалари катта устунликка эга бўлди. Шундан сўнг бизда устунлик бўлди, аммо бу кўпроқ «Бунёдкор»нинг ўйин темпини бироз пасайтиргани билан боғлиқ. Футболчиларим бугун якка курашларда мағлуб бўлди. Фикримча, бугун шу сабабдан мағлубиятга учрадик. Қолаверса, майдон марказида жуда кўп қўпол хатоларга йўл қўйдик. Оғир мағлубият бўлди. Ҳозир тактика, паслар ёки бошқалар ҳақида гапиришнинг мавриди эмас. Ўйинимизни кучайтиришга қийналяпмиз. Кетма-кет олтинга тенг очколарни йўқотяпмиз. Бу эса мавсум якунида катта таъсир ўтказиши мумкин.

Жамоада молиявий муаммолар йўқ. Мана учинчи ўйинки тезкор гол ўтказиб юборяпмиз. Шундан сўнг ўйинимиз бузиляпти. Ваҳоланки, «Локомотив» бундай ўйин кўрсатадиган даражадаги жамоа эмас.

Истеъфо? Бу борадаги гапларга ўрганиб қолганман. Ҳозирча менга бу ҳақида раҳбариятдан ҳеч қандай гаплар бўлгани йўқ», — дейди Фёдоров.

Шундан сўнг «Бунёдкор» бош мураббийи Вадим Абрамов матбуот анжуманида қатнашди.

«Локомотив»ни тўла ўрганиб чиққандик. Шунга мос равишда қаршилик кўрсатишга уриндик. «Пахтакор»га йирик ҳисобда ютқазганимиздан кейин мухлислар учун ҳам бугун ғалаба қозонишимиз керак эди. Футболчилар бугун муносиб ўйин кўрсатди, уларга раҳмат. Рақибимиз таркибида тажрибали футболчилар йиғилганига қарамасдан, ўйин бўйича устунлик қилдик. Афсуски, деярли ҳамма футболчиларимизда катта тажриба йўқ. Аниқроғи, улар мана эндигина иккинчи йил юқори лигада ўйнашмоқда. Бугун йирик ҳисобда ғалаба қозонишимиз ҳам мумкин эди, бироқ вазиятлардан фойдалана олмадик» — дейди Абрамов.

«Бунёдкор» ушбу ғалабадан кейин очколарини 12 тага етказиб олган бўлса, «Локомотив» 6 очко билан 10-ўринда бормоқда.