Қозоғистон собиқ президенти Нурсултон Назарбоевнинг жияни — Миллий хавфсизлик қўмитаси раисининг собиқ биринчи ўринбосари, генерал-лейтенант Самат Абишга қарши тергов бошланди. Бу ҳақда Қозоғистон Бош прокуратураси хабар берди.

Бош прокуратуранинг махсус прокурорлари Самат Абишга нисбатан “январь воқеалари” вақтида мансаб ваколатини суиистеъмол қилганликда айблаб, терговга қадар текширув ўтказмоқда. Тергов катта миқдордаги махфий ҳужжатларни ўрганишни ўз ичига олади.

Қозоғистон Жиноят-процессуал кодексининг 201-моддасига мувофиқ, тергов манфаатларини кўзлаб, дастлабки терговнинг бошқа маълумотлари ошкор этилмайди.

“Конституция нормаларига кўра, қонун ва суд олдида ҳамма тенг”, — дейди Бош прокуратура.

Текширув натижаларига кўра ҳуқуқий процессуал қарор қабул қилинади.

2022 йил Қозоғистондаги “қонли январь” воқеаларидан кейин Назарбоев оиласи вакиллари Қозоғистоннинг катта компаниялари, давлат органлари ва ташкилотларидаги лавозимларидан маҳрум бўла бошлади.

Жумладан, Қозоғистон биринчи президентининг икки куёви нефть-газ соҳасига оид йирик компаниялардаги лавозимини тарк этган. Элбошининг кенжа қизи Алиянинг турмуш ўртоғи Димаш Дўсанов “КазТрансОйл” бош директори лавозимидан, тўнғич қизи Дариғанинг “эри” Ғайрат Шарипбаев эса “ҚазақГаз Миллий компанияси” АЖ бошқаруви раиси лавозимидан истеъфога чиққан. Кейинчалик учинчи куёв – Тимур Кулибаев “Атамекен” миллий тадбиркорлар палатаси раҳбари лавозимидан истеъфо берди.

Қозоғистон президенти Назарбоевнинг жияни, Миллий хавфсизлик қўмитаси раҳбарининг биринчи ўринбосари генерал-лейтенант Самат Абишни лавозимидан озод этиш ҳақидаги фармонни имзолаган.

Қозоғистон биринчи президентининг катта қизи, депутат Дариға Назарбоева январь охирида парламент қуйи палатасининг ялпи мажлисида январь охиригача иштирок этмаслигини маълум қилган. Унинг матбуот котиби сиёсатчи аёлнинг мазкур қарорини COVID-19 билан касаллангандан кейинги реабилитация жараёни билан боғлиқлиги ҳақида изоҳ берган.