Қозоғистонда 2022 йил январида давлат тўнтаришини амалга ошириш учун Афғонистон ва Суриядан келган жангариларни жалб қилиш режалаштирилган. Бу ҳақда январь воқеаларининг икки йиллиги муносабати билан “Хабар” давлат телеканали томонидан намойиш этилган ҳужжатли фильмда маълум қилинди.
“Тартибсизликлар давом этган тақдирда Афғонистон ва Суриядаги бир қатор террорчилик ташкилотлари етакчилари Қозоғистонга тайёргарликдан ўтган жангариларини жўнатмоқчи бўлган”, — деб таъкидлаган фильм муаллифлари республика хавфсизлик кучлари маълумотларига таяниб.
Бироқ “қонуний ҳокимиятнинг инқирозни маҳаллийлаштириш ва бартараф этиш бўйича тезкор, қатъий ҳаракатлари фитначиларнинг режаларини чалкаштириб юборган ва Сурия сценарийсининг Қозоғистонда амалга ошишига имкон бермаган”, дейилади фильмда.
Хорижий террорчиларнинг аралашуви “тўртинчи, якуний ўзгаришлар тўлқини, бу бутун мамлакат бўйлаб радикал уйқу ҳужайраларининг кўтарилиши” доирасида амалга оширилиши керак эди, дейди фильм муаллифлари.
“Бунгача муваффақиятсиз давлат тўнтаришига уриниш режиссёрлари воқеалар ривожининг учта тўлқинини режалаштирган ва амалга оширган. Дастлаб тўқнашувларсиз тинч митинглар, сўнгра норозилик намойишини талон-торож ва ўт қўйиш билан радикал йўналишга ўзгартириш, учинчи тўлқинда эса жиноятчилар ва террорчилар тўғридан-тўғри жиноятлари ва шафқатсизликлари билан намоён бўлади.
2022 йил 10 январь куни Қозоғистон президенти Қосим-Жўмарт Тўқаев мамлакатда содир бўлган сўнгги оммавий тартибсизликларни узоқ вақтдан бери тайёрланган давлат тўнтаришига уриниш деб атаган.
“Қонли январь” воқеалари
2022 йил январь ойи бошида Қозоғистонда оммавий тартибсизликлар юз берди, уларнинг иштирокчилари полиция ва ҳарбий хизматчиларга ҳужум қилди. Тўқаев ёрдам сўраб КХШТга мурожаат қилди. 7 январга келиб вазият барқарорлашди, 19 январдан бутун мамлакат бўйлаб фавқулодда ҳолат бекор қилинди. Расмий маълумотларга кўра, ушбу ҳодисалар оқибатида 238 киши ҳалок бўлган, 4,5 мингдан ортиқ киши жароҳатланган.
Изоҳ (0)