Ўзбекистон Либерал-демократик партияси давлат органлари сотиб оладиган автомобиллар сонини чеклаш тарафдори. Бу ҳақда “Давлат бошқаруви ва суд-ҳуқуқ тизимини такомиллаштириш” мавзусидаги теледебатда ЎзЛиДеП вакили Бобур Бекмуродов айтиб ўтди.
Бобур Бекмуродовга кўра, давлат бюджети ва маҳаллий бюджетнинг пули ҳам халқнинг, солиқ тўловчиларнинг пули.
“Уларни тўғри тақсимлаш ва улардан оқилона фойдаланиш ниҳоятда муҳим. Мен биргина мисолни айтаман, илгари давлат органлари хоҳлаган автомобилларини хоҳлаганича сотиб олиши мумкин эди. Буни тартибга солиш учун ҳукумат қарори қабул қилинди. Ҳозирги кунда юқори нарх чегараси белгиланди. Шунинг ўзи ҳам катта нарса, аслида. Лекин биз бунда тўхтамоқчи эмасмиз. Биз нафақат юқори нарх чегараси, балки сонини ҳам чекламоқчимиз”, дейди ЎзЛиДеП вакили.
Бекмуродов нафақат автомобиллар, умуман қимматбаҳо нарсаларнинг сони ва юқори нарх чегараси белгилаб қўйилишини айтди.
“Буни биз қонунчиликда қилмоқчимиз. Хорижий тажрибани қарайдиган бўлсак, Германияни деймизми, Сингапурдами, давлат харажатлари жуда ҳам қатъий назорат қилинади”, дея қўшимча қилади у.
Изоҳ (0)