Tojikiston madaniyat vaziri Ibn Sinoning tojikligini da’vo qilmoqda

Tojikiston madaniyat vaziri Matlubaxon Sattoriyon Amerikaning CNN telekanalining Abu Ali ibn Sino o‘zbek olimi sifatida tilga olingan materialiga munosabat bildirdi.

U buni “haqiqatni buzib ko‘rsatish” deb atadi.

Matbuot anjumanida Asia-Plus savoliga javob berar ekan, u “CNN materialiga nisbatan diplomatik, ammo qat’iy munosabat bildirish zarurligini” ta’kidladi.

Tarixiy manbalarni e’tiborsiz qoldirib, tojik xalqining ilm-fan va adabiyot daholarini hamda adabiy merosimizni boshqa millatga o‘zlashtirish holatlari kuzatilmoqda. Bu, afsuski, ko‘plab bahs-munozaralarga sabab bo‘lmoqda, dedi vazir.

U tojik olimlari va ziyolilari “milliy madaniyat va adabiyot o‘g‘rilariga” rad etib bo‘lmas dalillarga tayanib munosib javob qaytarishiga ishonch bildirdi.

Bu nafaqat tojik xalqi, balki butun jahon fors adabiyoti tarixi va madaniyatini tahqirlashdir. Ishonchim komilki, bunga fors madaniy-adabiy doirasiga mansub mamlakatlar olimlari va tarixchilari, albatta, munosabat bildiradilar, dedi Sattoriyon.

Uning ta’kidlashicha, bu “qo‘shni davlatning rasmiy bayonoti emas” balki “shunchaki tarixiy asosga ega bo‘lmagan telekanal materiali”.

O‘tgan hafta CNN telekanali Abu Ali ibn Sinoni o‘zbek olimi sifatida tanishtirgan.