Энергетика вазири Жўрабек Мирзамаҳмудов 22 ноябрь куни Қонунчилик палатасидаги ҳукумат соатида Тошкентда қурилаётган янги кўп қаватли уйларнинг электр тармоқларига таъсири ҳақида гапирди.
Депутат Бобур Бекмуродов пойтахтда янги бино ва иншоотлар қурилиши кўлами кенгайиши эскирган инфратузилмага тушадиган юкламани ошириб юбориши мумкинлиги бўйича хавотирини билдириб, бу бўйича вазирнинг муносабатини сўради.
Энергетика вазири ҳозирда янги техник шартларни беришда вазирлик қатъий турганини билдирди.
“Авваллари уни ягона дарча орқали автоматик равишда ҳамма олган бўлса, ҳозирда бу нарса тақиқланди. Бугунги кунда Тошкент шаҳридаги ҳар қандай йирик истеъмолчилар, яъни авваллари 5 мегаваттдан юқори бўлса, ҳозир ҳаттоки 0,5 мегаватт ёки 200 киловатт уланиш бўлса ҳам, Энергетика вазирлиги даражасида, энергоинспекцияни жалб қилган ҳолда, мутахассислар ҳисоб-китобни қилганидан кейин техник шартлар бериляпти”, — деб жавоб берди Жўрабек Мирзамаҳмудов.
Унинг қайд этишича, айрим ҳолатларда техник шартлар бекор қилиниб, инвестор ёки тадбиркор тарафидан янги қурадиган объектига ўзи тармоқ тортиб келиш ёки алоҳида трансформатор қўйиш шартлари қўйиляпти.
Шунингдек, маълум қилинишича, қувватлар ва ишлаб чиқаришларни инобатга олган ҳолда янги техник шартларни ишлаб чиқиш, мавжудларини қайта кўриб чиқиш ишларига эътибор қаратилмоқда. Иқтисодиёт ва молия вазирлиги билан биргаликда энг аввало ҳудудларнинг ривожланиш даражасини инобатга олган ҳолда дастур тайёрланяпти. Дастурда қаерга янги подстанция қурилиши ёки янги тармоқ тортилиши кераклиги белгиланади.
Изоҳ (0)