Озарбайжон таклифи ва ташаббуси билан Ўзбекистон Президенти Администрацияси, АОКА, оммавий ахборот воситалари вакиллари, Ўзбекистон Нодавлат нотижорат ташкилотлар ассоциацияси ҳамда ННТ раҳбарларидан иборат делегация ушбу давлатда амалий ташриф билан бўлиб турибди.
Ташриф давомида Шуша, Фузулий туманларидаги бунёдкорлик ишлари, шунингдек, нодавлат ташкилотлари, шу жумладан, замонавий медиа тизимининг давлат томонидан қўллаб-қувватлаш фаолияти билан яқиндан танишиш, тажриба алмашиш мақсад қилинган.
27 ноябрь куни Фузулий шаҳридаги Ўзбекистон давлати томонидан беғараз қурилган Мирзо Улуғбек номидаги 1-сонли мактабда Озарбайжон—Ўзбекистон нодавлат ташкилотларининг ҳамкорлик I форуми бўлиб ўтди.
.jpg)
Форумда Олий Мажлиси ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди директори Отабек Хусанов, Демократик жараёнларни таҳлил қилиш маркази бошлиғи Азамат Пардаев, “Юксалиш” умуммиллий ҳаракати раиси Бобур Бекмуродов ҳамда Ўзбекистон волонтёрлар ассоциацияси директори Ширин Абидова иштирок этди.
Тадбир аввалида Қорабоғ озодлиги йўлида жангда шаҳид кетганлар учун ҳурмат бажо келтирилди.
Форумда сўзга чиққанлар ўзбек—озар халқининг азалий бирдамлиги, қардошлиги ва яқин дўстона муносабатларини алоҳида эътироф этди. Келгусида алоқаларни янада мустаҳкамлашда нафақат давлат органлари, муассасалар, балки нодавлат нотижорат ташкилотлар, ҳаракатлар ва бирлашмалар даражасида ҳам ҳамкорликни кучайтиришнинг зарурати ва аҳамияти қайд этилди.
Шунингдек, тадбирда ўзбекистонлик ННТ раҳбарлари фаолиятлари тўғрисида тақдимот ўтказди. Форум якунида Озарбайжон ва Ўзбекистон давлат раҳбарларига икки мамлакат Фуқаролик жамияти вакиллари мурожаати ўқиб эшиттирилди. Ташриф 30 ноябрга қадар давом этади.
Изоҳ (0)