Самарқанд вилояти Иштихон ҳокимлиги матбуот хизмати ходими журналист камерасининг флешкасини «еб қўйгани» ҳақида хабар берилганди. 2021 йил 16 июнь куни Самарқанд вилояти ҳокимлиги ахборот хизмати ҳамда АОКА ҳудудий бошқармаси томонидан ушбу ҳолат ўрганилди.
Маълум қилинишича, туман ҳокимлиги ахборот хизмати раҳбари MY5 телеканали мухбири Отажон Раббонақуловга ёнғин бўлган жой хавфли ҳолатда эканлигини инобатга олиб, ёниб кетган устунлар одамлар устига қулаши мумкин, деган хавотирда «Фуқаролар тарқалгандан кейин тасвирга оласизлар», деб ундан камерани ўчириб туришни сўраган.
Натижада ўртада келишмовчилик юзага келган. Аммо кейинчалик телеканал ходимлари барибир тасвирга олишни давом эттирган.
Шундан сўнг MY5 телеканали мухбири камераси флешкасини ҳокимлик ахборот хизмати раҳбари ютиб юборганлиги ҳақида хабар тарқалган.
Аниқланишича, ҳокимлик матбуот котиби камера флешкасини олмаганини ва уни ютиб юбормаганини, бу гаплар асоссиз эканлигини билдирган.
Маълумотга кўра, у журналистдан тасвирга олмаслигини сўраган. «Одамлар тарқалганидан кейин қайтариб бераман», деб операторга айтган ҳолда камерага тегинганини айтган.
MY5 телеканали мухбири Отажон Раббонақулов ҳам бошида туман ҳокимлиги ахборот хизмати раҳбари тасвирга олишга қаршилик кўрсатганлигини, кейинчалик эса мухбир туман ҳокими ва бошқа бир қатор фуқаролардан интервью олганлигини, матбуот котиби билан бозор ҳудудини бирга (бошқа фуқаролар иштирокисиз) тасвирга олишганлигини билдирган.
Бундан ташқари, камера флешкасини матбуот котиби ютиб юборганини ўз кўзи билан кўрмаганини, бошқалардан бу ҳақда эшитгани ҳамда ўзи тайёрлаган лавҳада ҳам ва бошқа нашр мухбирлари билан суҳбатда ҳам флешка ютиб юборилди деган сўзни ишлатмаганини баён этган.
Камеранинг ишдан чиққанлиги важи бўйича эса айни пайтда камера ишлаб турганлигини, бироқ тасвир сифати бироз пастлигини (тасвирлар қорароқ) айтган.
Маълум бўлишича, Иштихон туман ҳокимининг 2021 йил 16 июндаги фармойиши билан Бобоев Илҳомжон Исоқовичга ҳайфсан интизомий жазо чораси қўлланилган.
MY5 телеканали мухбири Отажон Раббонақуловга эса телеканал мулкига зиён етказилганлиги важи бўйича асос мавжуд бўлган ҳолатда судга мурожаат қилиш зарурлиги тушунтирилган. Шундан сўнг мухбир камера бузилганлиги ҳолати бўйича судга мурожаат қилмаслигини, даъвоси йўқлигини билдирган.
Аввалроқ Самарқандда сигнал чалгани учун Damas’ни жарима майдонига жойлаштиришни буюрган ЙҲХБ бошлиғига ҳайфсан берилгани ҳамда «Дарё» мухбирига қўполлик қилган Қарши шаҳар бош «милиционери» ўринбосари, кутилганидек, ҳайфсан олгани ҳақида хабар берилганди.
Изоҳ (0)