Европа Иттифоқи Россия нефти учун 60 долларлик нарх чегарасини белгилашга келишиб олди

Евроиттифоқ Кенгаши Россия нефтининг нархини қайта кўриб чиқиш механизми билан бир баррель учун 60 доллардан чеклаш қарорини расман тасдиқлади. Бу ҳақда Bloomberg хабар бермоқда. 

Бугун, 2 декабрь куни нархларнинг юқори чегарасига рози бўлмаган ягона давлат — Польша таклиф қилинган чораларни маъқуллади.

Элчилар ҳозиргина денгиз орқали ташиладиган Россия нефтининг нархини чеклаш бўйича келишувга эришди. Ёзма тартиб амалга оширилади, қарор ЕИнинг расмий журналида эълон қилинганидан сўнг кучга киради, — дейилади Чехиянинг ЕИ Кенгашидаги раислиги Twitter’да.

АҚШ ғазначилиги 1 декабрдан бошлаб Россия нефтининг нархи бир баррель учун 60 доллар этиб белгиланишини маълум қилганди. 

Politico нашрининг ёзишича, Польша юқори чегарани бир баррель учун 30 доллар қилиб белгиламоқчи эди.

Айни пайтда, 5 декабрдан Россия нефтига чекловлар кучга кириши муносабати билан уни ташиш нархи кескин ошади. 

Bloomberg маълумотларига кўра, Болтиқ денгизи ва Ҳиндистон ўртасидаги юк ташиш нархи 5 декабрдан кейин юкланган тақдирда, тахминан 15 миллион долларни (баррелига 20 доллар) ташкил қилиши мумкин. Илгари улар 9 миллион доллардан 11,5 миллион долларгача бўлган.