Жанубий Корея президенти Юн Сок Ёл коррупция учун икки йил-у беш ойга озодликдан маҳрум қилинган Samsung Electronics вице-президенти ва Samsung Group раҳбари Ли Чже Ённи афв этди, деб ёзади «РБК».
2017 йилда Чже Ён Жанубий Корея собиқ президенти Пак Кин Хега алоқадор компанияларга поралар беришда айбланганди, уларнинг миқдори 6 миллион доллардан ошган. Шунингдек, Samsung Electronics президенти давлат Samsung C&T va Cheil Industries қўшилишига унга зарур шартларда рухсат бериши учун мансабдорларга 38 миллион доллар таклиф этган ёки ваъда қилган. Суд бизнесменни беш йиллик қамоққа ҳукм қилди, аммо кейинроқ ҳақиқий муддатни шартлига ўзгартирди, бу пайтда у ҳибсда сақланаётганига бир йил бўлганди.
2019 йилда суд Ли Чже Ённинг ишини қайта кўриб чиқишга юборди, шундан кейин унга Чеил Industries ва Samsung C&Т корпорациялари қўшилиши ҳақидаги иш бўйича янги айблов эълон қилинди. Битим натижасида бизнесмен конгломерат устидан якка тартибдаги назоратни қўлга киритганди. Охир-оқибат ўтган йил январида Samsung Electronics вице-президенти икки йил ва олти ойга озодликдан маҳрум қилинди, аммо у ҳибсда ўтказган бир йил ҳисобга олинди.
Чже Ён ўтган йил августида муддатидан олдин озод этилган, бироқ ўз ҳуқуқларини тўлиқ қайта тиклаш учун у афв этилиши зарур бўлган. Афв этилганидан кейин у миллий иқтисодиёт учун қаттиқ меҳнат қилишга ваъда берди.
Бундан ташқари, Жанубий Корея президенти порахўрликда айбланиб, 2,5 йилга қамоққа ҳук қилинган Lotte Group раиси Син Дон Бинни ҳам афв этди. 2018 йилда бизнесмен Жанубий Корея собиқ президентининг дугонаси Чхве Сун Силга 6,4 миллион доллардан ортиқ миқдорда пора берганликда айбланганди.
Samsung вице-президенти ва Lotte Group раисидан ташқари, давлат раҳбари яна 1691 кишини афв этди. Ҳукумат афв 15 август — Корея Мустақиллиги куни кучга киришини эълон қилди.
Изоҳ (0)