Эроннинг “Истиқлол” футбол клуби ҳимоячиси Рамин Резаян 14-турда “Чадормалу” жамоасига қарши ўйиндан аввал аёлни қучоқлагани учун жаримага тортилди. Бу ҳақда “Тарафдори” нашри хабар бермоқда.
Мухлиса меҳмон жамоа автобусига яқинлашиб, Резаян билан қучоқлашган. Ушбу воқеадан сўнг футболчи Эрон чемпионати этика қўмитасига чақирилган ва унга 12 минг доллар (510 миллион риёл) жарима белгиланган.
Маълумки, Эрон қонунларига кўра, эркак ва аёл ўртасида омма олдида тегиниш тақиқланган. Бундай хатти-ҳаракатлар фақат эркак ва аёл бир-бирларига қариндош бўлган тақдирда рухсат этилади.
Маълумот учун, футболчи Эрон терма жамоаси аъзоси ҳисобланади. У 2015 йилдан бери миллий жамоа сафида 63 та ўйинда майдонга тушиб, 6 бор рақиблар дарвозасини ишғол қилган.
Изоҳ (0)