Футбол бўйича ЖЧ–2018 турнирига саралашнинг учинчи босқичида Ўзбекистон миллий терма жамоаси билан бир гуруҳдан ўрин олган Эрон ҳамда Қатар терма жамоалари аъзолари ФИФА Тартиб-интизом қўмитаси томонидан жазоланди. Бу ҳақда Ўзбекистон футбол федерацияси матбуот хизмати хабар бермоқда.
Саралашнинг учинчи босқичи 1-турида Теҳронда бўлиб ўтган Эрон – Қатар (2:0) ўйини давомида юзага келган жанжал сабаб Қатар терма жамоаси аъзолари – Машъал Абдуллоҳ, Аҳмад Ёсир ва Холид Муфтани иккитадан ўйинга, Абдулкарим Ҳассан эса уч ўйинга четлатилди.
Аввалроқ Эрон терма жамоаси аъзолари Сардор Азмун ва Эҳсон Ҳожисафи биттадан ўйинга четлатилгани ҳақида хабар берилганди. Шунингдек, ушбу футболчиларга 5 минг доллар миқдорида жарима солинди.
Бундан ташқари, саралашнинг учинчи босқичи 4-турида Эрон – Жанубий Корея (1:0) учрашуви олдидан стадионда ва танаффус вақтида диний маросим ўтказилгани ҳамда мухлислар томонидан диний баннерлар кўтарилгани сабаб Эрон футбол федерацияси 45 минг доллар миқдорида жаримага тортилди.
Изоҳ (0)