Франция президенти Эммануэл Макрон лавозимининг охиригача истеъфога чиқиш ниятида эмаслигини маълум қилди. Сиёсатчининг сўзларини Le Figaro газетаси келтирмоқда.
Парламентдаги мухолифат Макроннинг истеъфосини кутмоқда ва муддатидан олдин президентлик сайловларини ўтказишга чақирмоқда.
Сиз менга демократик йўл билан ишониб топширган мандат — бу беш йиллик мандат ва мен уни охиригача тўлиқ бажараман, деди Франция президенти.
Макроннинг сўзларига кўра, унинг масъулияти давлат узлуксизлигини таъминлаш, институтларнинг тўғри фаолиятини ташкил этиш, Франция мустақиллигини ва унинг фуқароларини ҳимоя қилишдан иборат.
Франция ҳукумати истеъфоси
4 декабрь куни парламент Мишел Барне ҳукуматига ишончсизлик вотумини эълон қилди: қарорни 574 депутатдан 331 нафари қўллаб-қувватлади. Охирги марта бундай овоз бериш 1962 йилда эълон қилинган.
Бунга Барне конституцияда мустаҳкамланган ҳуқуқига асосан бюджет тўғрисидаги қонунни парламентда муҳокама ва овоз беришсиз тасдиқлагани сабаб бўлди. Бюджет тақчилликни қисқартириш учун 60 миллиард евро тежаш кўзда тутилганди.
Ўта ўнг ва сўл депутатлар Барнега қарши овоз бериш учун бирлашди. 5 декабрь куни Барне Макронга истеъфо аризасини топширди. Президент яқин кунларда янги бош вазир тайинланишини маълум қилди, аммо унинг номи ҳали эълон қилинмади.
- 8 июлда Франциянинг ўша пайтдаги бош вазири Аттал парламент сайловларида ўта сўл кучларнинг ғалабаси туфайли истеъфога чиқди.
- 5 сентябрь куни Макрон Барнени янги бош вазир этиб тайинлаган эди.
Изоҳ (0)