Telegram мессенжери 4 декабрь куни Android ва iOS учун 11.5 версиясигача янгиланди. Эндиликда фойдаланувчилар коллаж-сторислар яратиши, сунъий интеллект (СИ) ёрдамида расмий стикерлар қидирувини амалга ошириши мумкин. Қуйида янгиланишлар ҳақида батафсил маълумот берамиз.
Stories коллажлар
Энди фойдаланувчилар бир Stories ичида 6 тагача расм ёки видео тўплаши, шунингдек, уларни тартибга солиш учун турли вариантларни танлаши мумкин. Танланган қисмларни кўчириш, алмаштириш ва ўчириш имконияти ҳам мавжуд.
Сунъий интеллект ёрдамида расмий стикер қидируви
Стикерлар панели мураккаб бир нечта калит сўзли қидирувларни қўллаб-қувватлайди. Қидирув фақат Telegram жамоасининг барча расмий тўпламлари орасида амалга оширилади. Бегона стикерлар қўллаб-қувватланмайди.
Медиа файллардаги ёзувлар
Медиа файл муҳарририда янги “Имзони тепага кўчириш” тугмаси пайдо бўлди. Бу фойдаланувчига бириктирилган расм ёки видеога нисбатан матннинг ўрнини тезда ўзгартириш имконини беради.
Ҳамкорлик дастурлари
Telegram’даги барча фойдаланувчилар ва каналлар энди мини-иловаларни ишлаб чиқувчилардан ҳамкорлик дастурларида юлдузлар олишлари мумкин. Жалб этилган фойдаланувчи сизнинг мини-иловага йўналтирувчи ҳаволага ўтса ва Telegram юлдузлари ёрдамида у ерда харидларни амалга оширса, сиз фойдаланувчи томонидан иловада сарфлаган юлдузларнинг маълум фоизи миқдорида мукофот оласиз.
Ҳамкорлик дастурларини ишга тушириш
Telegramъда ҳар қандай мини-иловалар ёки ботлар ишлаб чиқувчиси ўзининг ҳамкорлик дастурини ишга тушириши ҳамда келажакдаги даромадининг неча фоизини ва қанча вақт давомида мукофотни фойдаланувчиларни хизматга жалб қиладиганлар билан баҳам кўришга тайёрлигини кўрсатиши мумкин.
Изоҳ (0)