Telegram мессенжери 30 июнь куни 10.14.1 версиясига янгиланди, эндиликда канал эгалари контентларини пуллаши, фойдаланувчилар эса янги функцияларга эга Stories қўйиши мумкин бўлади. Қуйида янгиланишлар ҳақида батафсил маълумот берамиз.
Бир нечта мини-иловалар билан ишлаш
Telegram маълумотларига кўра, ҳар ой 500 миллион фойдаланувчи мини-иловалар билан ишлайди. Энди уларни пастки панелга жойлаштириш мумкин. Бу мессенжернинг қолган функциялари билан ишлаш ва исталган қулай вақтда мини-иловаларга қайтиш имконини беради.
Telegram’да контентларни пуллаш
Эндиликда канал эгалари мессенжерда пуллик суратлар ёки видеолар жойлаштириши мумкин. Улар учун тўлов мессенжернинг ички валютаси — Telegram Stars орқали амалга оширилади. Канал эгалари рақамли валюталарни TON’га ўтказиши ёки ундан Telegram Ads платформаси орқали каналини реклама қилишда фойдаланиши мумкин.
Рақамли товар ва хизматларга эга бот яратувчилар энди TON’да мукофот олиши мумкин бўлади. Telegram Stars’даги транзакциялардан деярли ҳеч қандай комиссия олинмайди, шунинг учун фақат солиқлар ва тўлов тизими комиссиялари ундирилади.
Stories’ни ҳештег ва жойлашув бўйича қидириш
Шу пайтгача ҳар қандай чатда #heshtegni босиш орқали қидирув натижаларини чатларда ва оммавий каналларда кўриш мумкин эди. Аммо янгиланиш билан энди Storiesъларни ҳам кўриш мумкин бўлади. Бундан ташқари, жойлашув белгисини босиш орқали ҳам Storiesъни қидириш имконияти бор.
Stories’ларга ҳавола қўйиш
Telegram Premium фойдаланувчилари энди ҳаволалар билан бирга виджетлар яратиши, шунингдек, URL манзили акс этган матнга ўзлари сўз ёзишлари мумкин.
Изоҳ (0)