Тошкент шаҳар Мирзо Улуғбек тумани “Дархон” мавзесида жойлашган шу номли сайилгоҳ аҳоли учун ўз эшикларини очди. Бу ҳақда пойтахт ҳокимлиги матбуот хизмати хабар берди.
Сентябрь ўрталарида “Дархон” кафеси рўпарасидаги собиқ “Сказка” боғидаги ёғоч монументлар олиб ташланаётгани тўғрисида хабарлар тарқалганди. Пойтахт ҳокимлиги ҳолатга муносабат билдириб, кўп йиллар давомида кўримсиз ҳолатга келиб қолган ушбу маскан, монументлар ва мавжуд фавворалар маҳалла фуқаролар йиғини билан келишилган ҳолда MDF Farmation МЧЖ томонидан қайта таъмирланаётганини маълум қилганди.
15 сентябрь куни сайилгоҳда реконструкция ишлари бошланиб, ҳудудда ёритиш тизимлари, йўлаклар янгиланди. Ҳовузларнинг ички қопламаси янгисига ўзгартирилиб, ўриндиқлар, чиқинди ташлаш қутилари ўрнатилди. Бундан ташқари, сайилгоҳга туташ ҳудудда болалар ўйингоҳи ўрнатилди, — дейилади хабарда.
Пойтахт ҳокимлигининг “Газета.уз”га маълум қилишича, бажарилган ишлар суммаси 2,96 миллиард сўмни ташкил қилган.
Бундан аввал Экология, атроф-муҳитни муҳофаза қилиш ва иқлим ўзгариши вазири маслаҳатчиси Расул Кушербаев ўзининг Telegram каналига пойтахтнинг Олмазор туманида дарахтлар дрель ёрдамида тешилиб, қуритилаётгани айтилган видеони жойлаштирганди.
Тошкент ботаника боғи хулосасига кўра, дарахтлар қуриш ҳолатига келиб қолган. Натижада Вазирлар Маҳкамасининг 2022 йил 22 августдаги 464-сонли қарорининг 4-иловасига асосан ўсимлик дунёсига 1 миллиард 97 миллион 184 минг сўм зарар етказилган.
Изоҳ (0)