Telegram жамоаси илованинг янги версиясини тақдим қилди.
Бу сафарги янгиланишда катта гуруҳларда муҳокамаларни тартиблашда ёрдам берадиган мавзулар, хавфсиз блокчейн орқали харид қилиш мумкин бўлган янги коллекцияланадиган фойдаланувчи номлари, видео хабарларни матнга айлантириш имконияти ва бошқалар тақдим этилди.
Гуруҳлардаги мавзулар
Telegram гуруҳлари юз минглаб фойдаланувчига эга йирик ҳамжамиятларни дастаклайди. Бу чатларни ўқиш осон бўлиши учун 200 тадан ортиқ аъзога эга гуруҳлар энди мавзуларни ёқиши ва исталган мавзу учун алоҳида майдон яратиши мумкин.
Янги функция турли саволлар муҳокамасини асосий гуруҳ ичида турли чатларга бўлиш имконини беради. Ҳар бир мавзу учун янги хабарлар ҳақидаги билдиришномаларни алоҳида созлаш ва уларда жойланган медиаларни («Умумий медиа») кўриш мумкин.
Иштирокчилар сўровномалар, қадалган хабарлар ва ботлар каби барча севимли функцияларидан фойдаланган ҳолда «Аниме»дан тортиб «Зоология»гача исталган мавзуда суҳбатлашиши мумкин.
Бу функция катта гуруҳлар учун махсус яратилган. Улар чатларни алоҳида созлашнинг янги имкониятларини очади ва муҳокамаларга қизиқишни ушлаб туришга ёрдам беради.
Telegram жамоаси йил охиригача кичик гуруҳлар учун алоҳида воситалар мажмуасини тайёрлашни ҳам режалаштирмоқда.
Гуруҳ админлари мавзуларни Гуруҳ созламаларида ёқиши ва Рухсатлар рукнида кимларга мавзулар яратиш ва бошқариш рухсати берилишини бошқариши мумкин.
Telegram’да ҳар доим бўлгани каби келгуси янгиланишларда ушбу функция админлар ва фойдаланувчилар учун қўшимча қулай воситалар билан бойитилади.
Видео хабарлар учун овозни матнга айлантириш
Telegram Premium ишга туширилганидан буён обуначилар исталган овозли хабарни тинглашдан кўра ўқиш қулайроқ бўлган ҳолатлар учун матнга айлантира олиш имкониятга эга бўлган эди.
Бу янгиланишда айни функция видео хабарларга ҳам қўшилди. Бу Premium фойдаланувчиларга тезкор матн транскрипсиясини олиш имконини беради.
Янги эможи тўпламлари
Минглаб фойдаланувчилар махсус эможи тўпламларини яратишни қизиқиш билан синаб кўрмоқда.
Улардан Telegram рассомлари ҳам ортда қолмаяпти: улар ушбу янгиланишга 12 та янги эможи тўпламини тайёрлашди. Premium фойдаланувчилар ушбу эможилардан исталган хабар ва изоҳларда фойдаланиши ёки уларни Хеллоуин учун статуслар сифатида белгилаши мумкин:
iOS учун иловада янги дизайндаги тунги режим
iOS учун иловада тунги режим дизайни янгиланди: янада мувозанатланган ранглар бирикмаси танланди ҳамда хабарлар ва чатлар рўйхатини варақлашда хиралаштириш эффекти яхшиланди.
Android учун иловада матн ўлчамини ўзгартириш
Android учун иловадаги «Чат созламалари» менюсида матн ўлчами ўзгартирилса, барча чат матнлари, жумладан, ҳаволага разм солиш экрани, хизмат хабарлари ва бошқалар ўлчами ҳам ўзгаради.
Изоҳ (0)