Севимли Шурик — афсонавий актёр Александр Демяненко ҳақида кўпчилик билмайдиган маълумотлар (фото)

Ҳаёт бўлганида, 2021 йилда 84 ёшни қаршилаши мумкин бўлган рус актёри Александр Демяненко билан боғлиқ қизиқарли маълумотларни эътиборингизга ҳавола этамиз.

Свердловскда дунёга келган Александр Демяненконинг отаси маҳаллий опера театри солисти бўлган ва консерваторияда дарс берган. Бўлажак актёрнинг ҳам овози чакки бўлмаган. Мусиқий мактабга борган Демяненко театр тўгарагида чиқиш қилган. Демяненко биринчи рафиқаси Марина Склярова билан бирга ўқиган ва тўгаракларга бирга қатнаган. Склярова актёрдан 2 ёш кичкина бўлган. Мактабни тугатган Александр Москвага, Марина эса Ленинградга ўқигани жўнаб кетган. Кейинроқ турмуш қурган жуфтлик 12 йилдан ортиқ бирга яшаган.

Актёр биринчи рафиқасини бошқа аёл — Людмила сабаб кутилмаган тарзда тарк этган, Марина эса умрининг охиригача ёлғиз яшаган.

Демяненко кинода суратга тушишни эрта бошлаган. Ақлли талаба, ҳарбий ва олимлар ролини гавдалантирган актёр суратга тушган Александр Аловнинг фильми Венеция кинофестивалида эътироф этилган. Леонид Гайдай билан танишгунига қадар 5 йил давомида эса турли ленталарда иштирок этган. Ўша вақтлар Гайдай «Жиддий бўлмаган» ҳикояларидаги талаба Владик Арков роли учун актёр қидираётган бўлган. Бир қанча актёрлар синалганига қарамай, Демяненко энг моси деб топилган. Режиссёр қаҳрамони малла соч бўлишини истагани учун актёрнинг тўқ сочларини бўёқ ёрдамида очартиришга қарор қилинган.

Шурик ролини гавдалантирганидан кейин режиссёрлар уни фақат шундай ролларда кўра бошлаган ва жиддий роллар таклиф қилинмаган. Аслида, ҳаётда ўта жиддий ҳамда ўйчан бўлган актёр мухлисларининг унда ҳамиша талаба образини кўриши, бегоналарнинг кўчаларда қучоқ очиб кўришишини ҳазм қилишга қийналган, шулар сабаб ҳам ўз қаҳрамонини ёмон кўрган.

«И операцияси» ва «Иван Василевич касбини ўзгартиради» фильмларида бирга суратга тушганига қарамай, Наталя Селезнева ва Демяненко ҳаётда деярли гаплашмаган. Суратга олиш жараёнларидан бир неча йиллар ўтиб учрашиб қолганида актриса қучоқлашиб кўришмоқчи ва гаплашмоқчи бўлган. Актёр эса шунчаки бош силкиб, салом бериш билан чекланган, холос. Шунга қарамай, улар гавдалантирган қаҳрамонлар Шурик ва Лидага қўйилган ҳайкал Краснодар, Рязани ва Москвадаги боғларни безаб туради.

Актёр театрда рол ижро қилишдан ташқари, Ленинград телевидениесидаги теледастурни олиб борган ҳамда дубляжда ҳам етакчи бўлган. У Роберт де Ниро, Жан-Поль Белмондо, Омар Шариф ва Донатас Банионисларга овоз берган.

Иккинчи рафиқаси Людмила билан актёр дубляж режиссёри ассистенти бўлиб ишлаётган вақтда танишган. 12 йиллик турмушдан кейин Людмилага уйланган Александр ҳаётининг қолган қисмини у билан бирга кечирган. Жуфтликнинг фарзанди бўлмаганига қарамай, Людмиланинг қизи Анжелика актёрга ўз фарзандидек эди.

Актёрнинг юраги билан боғлиқ жиддий муаммолари бўлган. Инфарктни бир марта оёқда кечирган Демяненко орадан бироз вақт ўтиб, қайта инфаркт бўлиб қолган. Жарроҳлик амалиёти ўтказилиши керак бўлган, аммо актёр унгача етиб боролмаган. Александр Демяненко 1999 йил августда вафот этган.