Фақат биргина образ билан томошабин хотирасида қолиш ҳар қандай актёр фаолияти учун ҳалокатдир. Экрандаги қаҳрамон бошқа фильмларда буткул ўзга ролни ижро этиши баъзи мухлисларнинг салбий муносабатига олиб келиши мумкин. Қуйида уларга машҳурлик келтирган образларни ижро этгандан афсусланган актёрлар ҳақида сўз боради.
Арчил Гомиашвили
Режиссёр Леонид Гайдайнинг “12 та стул” комедиясида Остап Бендер исмли қаҳрамонни ижро этган Арчил мазкур ролга катта рақобатдан сўнг сазовор бўлган. Бош қаҳрамон роли учун икки юздан ортиқ актёрлар, жумладан, Спартак Мишулин, Владимир Висоцкий, Муслим Магомаев ва Андрей Миронов кабилар кастингдан ўта олмаган.
Режиссёр аввалига Висоцкий билан фильмни суратга ола бошлаган, аммо натижалар Гайдайга ёқмагач, унга Арчил Михайловични таклиф этишган. У ўша вақтлар “Остап Бендернинг саргузаштлари” моноспектаклида чиқиш қилаётган эди. Юз ифодаларидан тортиб айёр нигоҳигача Бендерни маҳорат билан ижро этганини кўрган режиссёр Арчилни фильмга таклиф этди ва “12 та стул” фильми улкан муваффақиятга эришди
Бироқ Гомиашвили ўз ролидан қониқмади. Актёр сўзларига кўра, фильмдан кўра унинг театрдаги ижроси яхшироқ чиққан.
“Фильм яхши монтаж қилинган, режиссёр Леонид Гайдай эса комедия жанри қонунларини жуда яхши билади. Аммо лойиҳа камчиликлардан холи эмас. Асарда Остапнинг руҳиятига эътибор берилмади. Мен бу ролни шошган ҳолатда — фильмни суратга олиш ритмида ижро этдим”.
Қолаверса, менга бошқа актёр овоз берганди. Фильмни бошқа овозда кўргач ўзимни жуда ёмон ҳис қилдим. Премьерадан сўнг Гайдайга қарата: Бу ролни қанчалик ўйнашни истамайин, агар ниҳоя шундай бўлишини билганимда эди, суратга тушишга ҳеч қачон рози бўлмас эдим, дедим. Шундан сўнг биз беш йил давомида гаплашмадик”.
Александр Демяненко
1965 йилда “И операцияси” фильми экранларга чиқишидан аввал актёр Александр Демяненкога бошқа фильмлар учун бош роллар таклифини беришган. У “Давлат жиноятчиси”, “Дима Горин карьераси” фильмларида суратга тушган.
Табиатан камтарин ва камгап Александр Шурик образини маҳорат билан ижро этди. Мазкур ролни ўйнаш актёрга умуман қийинчилик туғдирмади, бироқ келгусида режиссёр Гайдай билан тузилган лойиҳа яна давом этиши ҳақида актёр бехабар эди.
Доимо драма йўналишида ишлашни истаса-да, “И операцияси ва Шурикнинг бошқа саргузаштлари” фильми учун Демяненко Гамлет ролидан воз кечишга мажбур бўлди. Кўчаларда уни кўриб қолганлар “Ана, Шурик келяпти” дея бақиришлари унга ҳеч ҳам ёқмас эди:
“60 ёшга тўлган бўлсам-да, ҳамон мени Шурик деб чақиришлари доим ёқимсиз эди. Аммо секин-аста бунга кўника бошладим ва мухлислар мени юзда табассум билан ёдга олишлари ҳам аслида бир бахт эканлигини англадим”, — дейди Александр Демяненко.
Михаил Кононов
Совет актёри Михаил Кононов “Катта танаффус” фильмида ўқитувчи Нестор Петровични ижро этгач, актёр фаолиятида катта зиддиятлар юзага келди. Михаил сўзларига кўра, у одамлар онгида биргина образ билан гавдаланар, актёрни эса бошқа лойиҳаларга олишни исташмас эди.
Фильмни суратга олиш жараёнида актёр бошқа иштирокчилар билан келишмас, сценарийга ўзгартиришлар киритишга уринар ва ҳамкасбларини доимий танқид қилиб борар эди. Актёр сўзларига кўра, “Катта танаффус” фильми уни жиддий ролларни ўйнаш имкониятидан маҳрум қилган. Кононовга фақатгина “Андрей Рубльёв” фильмидаги Фома исмли кичик образи маъқул келган.
Ирина Муравёва
Ирина Вадимовнага “Москва кўз ёшларга ишонмайди” фильмида ўйнаган Людмила Свиридова образи қўполлиги ва одобсиз эканлиги билан ёқмайди. “Энг мафтункор ва жозибали” фильмига эса у аввалдан қарши бўлган ва режиссёрлардан жиддийроқ фильмда суратга тушиш таклифини олмоқчи бўлган.
Фильм директори Галина Белинская уни рози қилиш учун Иринанинг уйига борган ва мазкур лойиҳанинг афзалликлари ҳақида айтиб берган. Муравёванинг турмуш ўртоғи рафиқасини қўллагач, актриса мазкур ролни ижро этишга рози бўлади ва “Энг мафтункор ва жозибали” фильми совет даврининг классикасига айланади.
Андрей Мягков
“Тақдир ҳазили ёки қушдек енгил бўлинг” (1975) фильмидаги Женя Лукашин образи актёрга умуман ёқмайди. Ушбу лойиҳадан сўнг Мягков ҳақида нотўғри тасаввурлар уйғонган ва режиссёрлар томонидан яхши таклифлар келиши тўхтаган.
“ ‘Тақдир ҳазили ёки қушдек енгил бўлин’ фильми менинг фаолиятимга нуқта қўйди. Гарчи спиртли ичимликларни ёқтирмасам ҳам, ҳамма мени алкоголга муккасидан кетган деб ўйлайди! Бу фильмни ҳар йили Янги йил арафасида томоша қилишдан чарчамайдиган томошабинларни ҳеч тушунмайман”, — дейди актёр.
Изоҳ (0)