1967 йилда энг машҳур совет талабаси — оқкўнгил Шурикнинг саргузаштлари ҳақидаги комедия экранларга чиқди. Циркда арқонда юрувчи Наташа Варлей спортчи ва гўзал қиз Нина ролига маъқулланди (бошқа актрисаларнинг деярли 500 та фотосурат синовларидан сўнг). Аммо Юрий Никулин ва Евгений Моргунов анча вақтгача суратга тушишга рози бўлмайди ва Гайдайдан фильм сюжетини якунлашни талаб қилишади — улар сценарий ҳали хом, қайта ишланиши керак деб ўйлашган. Кутилмаганда комедия муваффақият қозонди, ўз қаҳрамонларини эса абадиятга муҳрлади.
Наталя Варлей, 75 ёшда
Леонид Гайдай билан ишлаш Эстрада ва цирк мактабининг 19 ёшли битирувчиси Наталя Варлей учун ҳақиқий омад эди. Бироқ «спортчи, комсомолчи ва соҳибжамол» ўз карьерасини кескин ўзгартиришга қарор қилади ва кейинги роли сифатида биринчи совет даҳшатли фильми «Вий»даги жодугар аёл образини танлайди. Шундан сўнг актриса комедия («12 стул») ва драма («Олтин»)ларда рол ўйнаса-да, аммо Гайдай фильмидаги каби машҳур бўлмади.
Варлейнинг икки ўғли бор. Актрисанинг катта ўғли Василий иккинчи эри — актёр Владимир Тихонов билан турмушидан. 1985 йилда актрисанинг иккинчи ўғли Александр туғилади, у ҳозирда режиссёр бўлиб ишлайди ва ўз киностудиясини бошқаради. Унинг отаси, миш-мишларга кўра, ўзбек актёри Ўлмас Алихўжаев бўлиб, Варлей у билан 1984 йилда «Оловли йўллар» фильмида бирга рол ўйнаган. Аммо актриса бу мавзуда гапирмайди, ўғлига ҳам ўз фамилиясини берган.
Олти йил олдин Настя Задорожная «Кавказ асираси» фильми ремейкида Варлей қаҳрамонини ўйнаган. Гайдай комедиясининг янги версияси кассада муваффақиятсизликка учради: 3,5 миллион долларлик бюджет билан картина 180 000 доллар йиға олди, холос. «Кинопоиск» веб-сайтидаги ремейкнинг рейтинги 10 дан 1 балл.
Мавзуга доир: Совет киносининг энг гўзал беш актрисаси ҳозир қандай кўринишда? (фото)
Александр Демяненко, 1937 — 1999
ГITИС битирувчиси дастлаб драматик актёр сифатида иш бошлаган, аммо 60 йилларнинг ўрталарида Демяненко Леонид Гайдай комедиялари сериясида ғалати талаба Владик Арков ролига тасдиқланган ( бу рол учун Виталий Соломин ва Евгений Петросян ҳам кастинг топширган). Натижада қаҳрамон номини бош актёр шарафига ўзгартиришга ва актёрнинг сочини бўяшга қарор қилинади. Леонид Гайдай Шурикни сариқ сочли йигит сифатида кўради, Демяненконинг сочлари эса тўқ жигарранг эди. Доимий соч бўяшдан актёрнинг бош териси яллиғланади, шунинг учун франшизанинг навбатдаги фильми — «Иван Василевич касбини ўзгартиради»да — Демяненко табиий сочида кўриниш беради.
Актёр мактабдоши Марина Скляровага уйланиб, кейинчалик «Ленфильм» ходимаси Людмила Неволина билан оила қуради. Демяненко Людмиланинг биринчи турмушидан бўлган қизини ўз боласидек кўради, аммо эр-хотиннинг ўзи фарзанд кўролмайди.
Актёр 62 ёшида юрак ишемик касаллигидан вафот этади. 2005 йилда унинг беваси Людмила Демяненко ҳам дунёдан кўз юмади.
Мавзуга доир: Севимли Шурик — афсонавий актёр Александр Демяненко ҳақида кўпчилик билмайдиган маълумотлар (фото)
Фрунзик Мкртчян, 1930 — 1993
Актёр арман геноцидидан қочган табелчи ва идиш ювувчи оиласида туғилган. Фрунзик 15 ёшида ҳаваскорлар тўгарагида рол ўйнай бошлайди, театр ва санъат институтининг иккинчи йилида ёш актёр кинога таклиф этила бошлади.
Мкртчян «Кавказ асираси» фильмида ўзининг иккинчи рафиқаси Донара Пилосян билан бирга рол ўйнаган, у ўртоқ Саахов ҳайдовчисининг рафиқаси ролини ижро этган. Донара актрисанинг ўзи каби тақдири фожиали бўлган актёрдан Нина исмли қиз ва Вазген исмли ўғил кўради. Донара Мкртчян иккинчи фарзанди туғилгандан кейин шизофрения билан касалланади. Фрунзик хотинини даволаниш учун Францияга юборади, аммо рафиқасининг аҳволида ҳеч қандай яхшиланиш бўлмайди. Донара ҳаётининг сўнгги 25 йилини Арманистоннинг Севан шаҳридаги психиатрия клиникасида ўтказади ва унинг ташхиси ўғлига ўтади. 31 ёшли Вазген Мкртчян ҳам 2003 йилда айнан шу касалликдан вафот этади. Актёрнинг қизи Нина Мкртчян эса 39 ёшида автоҳалокат туфайли дунёдан кўз юмади.
Фрунзик Мкртчян 63 ёшида юрак хуружидан вафот этади.
Мавзуга доир: «Кавказ асираси»да Жаброил, «Мимино»да Хачикян — арманистонлик актёр Фрунзик Мкртчяннинг тақдири қандай кечган? (фото)
Владимир Этуш, 1922 йил 6 март — 2019 йил 9 март
Этуш — Улуғ Ватан уруши қатнашчиси. Актёр 19 ёшида фронтга кетиб, Кабарда ва Осетия тоғларида жанг қилган, Украинанинг Ростов-Дон шаҳрини озод қилишда қатнашган. Урушдан кейин Этуш Шчукин мактабини тугатади ва 8 йилдан сўнг фильмларда рол ўйнай бошлайди.
«Кавказ асираси» актёрнинг бешинчи роли эди. Ўша пайтда актёр учинчи марта уйланганди, 10 ёшли Раиса исмли қиз бор эди. 90 йилларнинг ўрталарида Раиса Этуш америкалик нефть бизнесменига турмушга чиқади ва АҚШга кетади.
Владимир Этуш 96 ёшида юрак хуружидан вафот этади.
Георгий Вицин, 1917 йил 18 апрель — 2001 йил 22 октябрь
Машҳур учликдан «қўрқоқ» сўнгги кунларгача Кино актёрлари театрида рол ўйнади, аммо олган пули яшаш учун зўрға етарди. Вицин бошқаларнинг ёрдамидан бош тортади, нафақа ва кам миқдордаги гонораридан кўчадаги ит ва каптарларни боқиш учун пул ажратарди. Актёр камдан кам ҳолларда уйидан чиқарди, матбуотда кўриниш бермасди.
Актёрнинг дафн маросимига унинг беваси Тамара Мичурина ва қизи Наталя, бир нечта қариндошлари ва қўшнилари келишади. Ёдгорлик ва қабр панжараси учун бир неча йиллардан бери маблағ йиғишга ҳаракат қилинса-да, керакли пул йиғилмайди.
Мавзуга доир: Ичмайдиган Вицин, сувга оқиб кетган Шурик. «Кавказ асираси» фильми ҳақида томошабинга маълум бўлмаган қизиқарли фактлар
Евгений Моргунов, 1927 йил 27 апрель — 1999 йил 25 июнь
«Кавказ асираси» фильмининг премьераси Леонид Гайдай ва Евгений Моргунов ўртасидаги жанжалнинг шов-шувида қолиб кетади. Моргунов фильмнинг ёпиқ техник намойишида катта жанжал чиқаради. У намойишга маст ҳолда, ичиб олган қизлар билан келади ва охирги қаторга ўтирволиб Гайдайни ҳақорат қилади. Актёрни олиб кетишади ва режиссёр лентани қайта ишлаб, Моргунов иштирок этган барча саҳналарни имкон қадар кесиб ташлайди. Шундан кейин Гайдай Моргунов билан умуман ишламайди — умрининг охиригача у билан гаплашмайди.
Бироқ Моргуновнинг ўзи учун 1966 йил омадли келади. Ёш хотини актёрнинг биринчи фарзанди — Антонни дунёга келтиради ва 1972 йилда оилада иккинчи ўғил Николай туғилади. Афсуски, Моргуновнинг кенжа ўғли рулда ухлаб қолиб, 26 ёшида вафот этади.
Мавзуга доир: Кулги ортидаги дард: «I операцияси» фильми юлдузи Евгений Моргуновнинг ҳаёти қандай кечган? (фото)
Юрий Никулин, 1921 йил 18 декабрь — 1997 йил 21 август
Никулин 18 ёшида фронтга кетган ва Совет-Финляндия кампаниясида қатнашган, Ленинград яқинида жанг қилган, «Жасорати учун», «Ленинград мудофааси учун» ва «Германия устидан қозонилган ғалаба учун» медаллари билан тақдирланган.
Демобилизациядан сўнг Юрий Рангли булвардаги Москва циркидаги масхарабозлар студиясига ишга киради — Никулин «актёрлик маҳорати йўқлиги учун» ВГИКга қабул қилинмайди.
28 ёшида Юрий Никулин ўзининг бўлажак рафиқаси, цирк артисти ва актрисаси Татяна Покровская билан танишади, у умрининг охиригача рафиқаси билан бирга яшаб, ўғли Максимни (ҳозирда Рангли булвардаги цирк директори) биргаликда катта қилади.
Изоҳ (0)