Ўз истеъдоди, жозибаси, шахсияти ва машҳурлиги билан Болливуд киносини янги даврга олиб чиқа олган ҳинд актёрлари билан танишинг.
1.Ашок Кумар
Болливуднинг биринчи юлдузи. Bombay Talkies муҳаррири Сашадҳар Мукҳержига қайноға бўлган. Ашок юридик коллеждаги имтиҳонлардан ўта олмаганидан кейин Калкуттадан Мумбайдаги синглисининг олдига келади. Бир мунча вақт у синглисининг эрига ёрдам бериш учун студияга ишга киради ва тасодифан актёр бўлади.
Студияда “Янги ҳаёт” фильми суратга олинаётган бўлиб, бош қаҳрамон Нажм-ул-Ҳасан ҳамкасби Девика Рани билан бирга қочиб кетади. Ўша пайтда Девика режиссёр Химаншу Райга турмушга чиққанди ва кейинчалик лойиҳага қайтади. Актёр эса ишдан бўшатилади.
Шундан кейин Мукержи Ашокни роль ўйнашга таклиф қилади. Кумарнинг энг катта бойлиги унинг харизмаси бўлиб, у хушмуомала ва келишган эркак эди. У чиройли тикилган костюм ва замонавий шляпаларда юрарди. Шундай қилиб, у ҳинд киносининг биринчи юлдузига айланади.
Ашок карьерасини ёш қаҳрамон сифатида бошлаган, лекин тезда катталар ролига ўтади. У ўзининг иккита кичик укаси Кишор ва Ануп Кумарни ҳам ёнига олиб, ўша даврнинг машҳур кино оилалари билан турмуш қуриш орқали оилавий сулола яратади. Саноат арбоблари ўртасидаги бу мураккаб никоҳларнинг барчаси Ашок Кумар томонидан бошланган.
2. Раж Капур
Ражнинг отаси Притҳвираж 30—40 йиллар юлдузи эди. Раж 21 ёшида Болливудда шов-шувларсиз карьерасини бошлаган, 23 ёшида эса у аллақачон юлдуз сифатида танилган. 27 ёшида у абадий классик “Дайди” фильмида роль ўйнайди — унинг экрандаги образи Чаплинга ўхшарди.
Қайсидир маънода у Чарлига тақлид қилади. Аммо унинг қаҳрамонларида ҳеч қачон Чаплиннинг беғуборлиги ва соддалиги бўлмаган. Ражнинг қаҳрамонлари мураккаб ва тўғрисўз эди. Унинг “Менинг исмим масхарабоз” фильмидаги сўнгги ажойиб роли ўзини ўзи акс эттиради.
Кулган, хурсанд бўлган, бошқаларга қувонч олиб келган, лекин ичида қайғу ва ўз кечинмаларини яширган масхарабоз — Раж Капурнинг ўзи эди. Ражнинг бутун саноатга таъсирини баҳолаб бўлмайди. У энг йирик студиялардан бири — RК Studios’га асос солган, афсуски, у ҳозирда мавжуд эмас.
Раж бошқа продюсерларнинг фильмларидан 3-4 баравар кўпроқ даромад келтирган рекорд даражадаги ҳитларни яратади. У янги кино ҳамжамиятининг қувноқ раҳбари эди, ҳозир ҳам кўпчилик томонидан севилади ва ҳурмат қилинади.
3. Дев Ананд
Дев Раж билан дўст бўлган, у ҳам карьерасини ўша пайтда бошлаган. У 1950 йилларда қадрдон дўсти Гуру Дутт томонидан суратга олинган фильмларда дебютини бошлайди.
Кейин у акалари билан биргаликда ўзининг продюсерлик марказини очади ва қизиқарли, мураккаб триллерлар қиролига айланади. Унинг энг катта роли, шубҳасиз, “Авлиё/Йўл бошловчи” фильми бўлиб, унда вазият таъсирида диний гуруга айланган оддий шаҳарлик йигит ролини ўйнаган.
Дев ёшлигида ҳайратланарли даражада келишган, қувноқ ва ҳар жиҳатдан вазмин бўлган. Актёр, шунингдек, 40 ёшга тўлгунга қадар ҳит фильмларда романтик ролларни ўйнайдиган “қаримайдиган” юлдуз эди.
У замонавий ва ранг-баранг кийимларни кийиб юрарди. Дев Ананд Болливуд оламига олиб келган актрисалар рўйхати жуда катта — 1950-70 йилларнинг энг яхши юлдузлари, жумладан, Ваҳида Раҳмандан Зинат Амангача.
4. Дилип Кумар
1950 йилларнинг учинчи қироли. Ражни “Шоумен”, Девни “Абадий юлдуз”, Дилипни эса “Трагедиялар қироли” деб аташган. Дилип ўз қаҳрамонлари, диалог тили, ташқи кўриниши, хулқ-атвори ва бошқалар устида ишлаш учун жуда кўп вақт сарфларди.
Унинг иккита энг катта роли “Буюк мўғул” фильмидаги Девдас ва шаҳзода Салим бўлиб, иккала фильм ҳам трагедия эди. Кейин “Рам ва Шям” комедиясида машҳур ролини ижро этади.
Дилип келишган актёр эди, лекин бу унинг асосий устунлиги эмасди. Теран нигоҳлар, урду тилининг нозик талаффузи, ролга тўлиқ киришиб кетиш — булар Кумарнинг асосий фазилатлари ҳисобланарди. У ўнлаб ёш актёрлар учун илҳом манбайи ва бош мураббийга айланади.
5. Ражеш Ханна
Болливуднинг биринчи суперюлдузи. 1969 йилда “Садоқат” фильми чиқиши билан у Ҳиндистондаги энг машҳур юлдузга айланади. Ражеш 15 та фильмдан иборат узлуксиз суперҳитларда суратга тушади — бу рекорд ҳали ҳеч ким томонидан янгиланмаган.
Кейинчалик 5 йил ўтгач, ўз шон-шуҳратини йўқотиб, сўна бошлайди. Актёр узоқ вақтгача суратга тушишни давом эттиради, унинг мухлислари ва ҳит фильмлари бор эди, аммо машҳурлик даври барибир ниҳоясига етади.
Бошқа актёрларнинг ҳам жозибаси ва истеъдоди бор бўлса-да, лекин Ханна том маънода аёлларни ақлдан оздирарди. Аёллар уни кўрганда ёки фильмларини томоша қилгандан кейин ҳушидан кетишарди. Унинг бошини ён томонга оҳиста буриши ва ярим табассум қилишининг ўзи етарли эди — у томошабинларни сеҳрлаб қўярди.
Ражеш Болливуд кино тарихида биринчи суперюлдуз сифатида ўз ўрнига эга. У Яш Чопранинг студиясини очишга ёрдам берган “Юрак тоши” фильмида суратга тушишга рози бўлган бўлса-да, ўзи студия очмаган ёки бошқа актёрларга устозлик қилмаган. Чопра айтганидек, Яш Раж Фильмс студиясида “Раж” номи Ражеш Ханнага кўрсатилган ҳурматни билдиради.
6. Амитабҳ Баччан
Ҳинд киносида янги даври Амитабҳ Баччан билан бошланади. Шоирнинг ўғли бўлган Амитабҳ 1973 йилда “Кечиктирилган қасос” фильмида дарғазаб йигит ролида чиқишидан аввал иккинчи даражали актёр сифатида иш бошлаган.
Танқидчилар у ҳақида Амитабҳда Дилип Кумарнинг актёрлик маҳорати ва Ражеш Ханнанинг харизмаси борлигини ёзишган. Актёр 10 йилдан ортиқ чўққида мустаҳкам тура олди, кейинги 10 йил давомида аста-секин пастга тушди ва Болливуднинг қаҳрамон актёри ҳамда киносаноатининг ҳурматли отаси сифатида танилди.
Амитабҳ баланд бўйли ва бақувват, чиройли овозга эга йигит эди. Ёшлигида унчалик жозибали бўлмаган. У бутун фаолияти давомида ёш режиссёрлар ва актёрлар билан ишлаш ҳамда кўпчиликка ёрдам қўлини чўзиш орқали ҳаммага ўзининг профессионаллик даражасини кўрсатади.
Амитабҳ мухлислар билан ўзаро муносабатда ҳам бошқаларга ўрнак бўла олади. Ҳар якшанба куни у уйи атрофида тўпланган оломонга қўл силкитиш учун балконига чиқади. У Twitter’да фаол ва мухлисларини ўзининг яқин оиласи деб атайди.
7. Амир Хон
Кино продюсерларининг ўғли, набираси ва жияни Амир кино ичида ўсган. У “Ҳукм” фильми билан ёшлар қалбидан жой олган ҳолда 90 йилларнинг бошларида кўплаб романтик ролларни ижро этади. Аммо кейин у аста-секин “жиддий” ролларга ўта бошлайди.
Амир Хон бир вақтнинг ўзида фақат битта лойиҳа устида ишлашини айтган ва энг юқори сифатли асар учун бор кучини сарфлаган биринчи юлдуз эди. Унинг нодир фильмлари доимо машҳур бўлиб, томошабинлар учун ҳамон қизиқарли.
Амирнинг жозибадорлиги ўзгармоқда. Ёшлигида актёрнинг беғубор кўриниши унга фақат мелодрамаларда ўйнашга имкон берарди. У ўсиб улғайган сари ўзининг ташқи кўриниши билан кўпроқ тажриба ўтказа бошлади ва перфекционист лақабини олади. У ҳар бир ролда бошқача бўлишга ва бир хил образни икки марта ўйнамасликка ҳаракат қилади.
Амир одатда тадбирларга боришни хушламайди. Тақдирлаш, тўй ва дафн маросимларида камдан кам қатнашади. Аммо йилига бир марта катта Дивали зиёфатини ўтказади, ҳамкасбларини доим ҳурмат қилади ва яхши муносабатда бўлади.
У “Оскар”ни қўлга киритишдан тортиб, “Лагаан: Бир пайтлар Ҳиндистонда” фильмларини Хитой ва Японияда намойиш қилишгача бўлган жаҳон саҳнасида Болливуд киносаноатини ёйишда катта таъсир кўрсатди.
8. Салмон Хон
1970 йилларнинг ажойиб сценарий муаллифи Салим Хоннинг ўғли ва Болливуднинг энг буюк раққосаси Хеленнинг ўгай ўғли. Салмоннинг кино алоқалари бўлса-да, лекин дебют ролини олиш учун улардан фойдаланмайди. Салмон Хон “Севдим” номли фильми орқали кинога шиддат билан кириб келгач, кўплаб мелодрамаларда роль ўйнайди ва ёшларнинг кумирига айланади.
90 йилларнинг ўрталаридан бошлаб у турли жанрлар, комедиялар ва жанговар фильмлар билан шуғулланиб, аста-секин жангари фильмлар юлдузи сифатида пайдо бўлади. У янги истеъдодларни кашф қиладиган кичик продюсерлик уйи билан ҳам танилган.
Мухлисларнинг айтишича, Хоннинг асосий устунлиги — унинг меҳрибон юраги. У ёш ошиқ йигитдан жангари фильмлар юлдузигача кўтарилди. Қайсидир маънода Салмон Болливуд киносаноатнинг юраги ҳисобланади. Унинг оилавий уйи ўзининг меҳмондўстлиги билан машҳур, у ердан ҳеч ким оч кетмайди.
Салмон хайрия ишларида ҳам фаол. Ҳаётида жуда кўп хатоларга йўл қўйган, аммо кўпчилик уни аллақачон кечирган ва унинг фақат яхши ишларинигина эслашади.
9. Шоҳруҳ Хон
Бошқаларга ўхшамайдиган 3-Хон. Фаолиятининг бошида у ҳамма рад этган қайғули ролларни ўйнайди. Кейин у романтик ролларда ўзини синаб кўради. Бошқа икки Хон шунга ўхшаш роллардан воз кечишни бошлаган пайтда бу роллар Шоҳруҳга машҳурлик келтиради.
Шоҳруҳ халқаро миқёсда ҳам машҳур актёр. Дарҳақиқат, унинг харизмаси ва жозибадорлиги ҳозир ҳам ёшлигидан-да кучлироқ. У жосус, қотил, психопат ва муҳаббатда омади келмаган йигит ролларини ўйнашдан қўрқмайди.
Шоҳруҳ ҳинд киносининг хориждаги юзи бўлиб, халқаро мухлислар ҳамжамиятини анча кенгайтирди. Кино саноатида у мезбондан кўра кўпроқ меҳмонга ўхшайди. Унинг Болливудда бир нечта яқин дўстлари бор, лекин шунга қарамай ҳали ҳам бир оз бегонадек кўринади.
Шоҳруҳ Хон Болливуд саноатига катта таъсир кўрсатган актёрлардан бири ҳисобланади. Netflix билан продюсерлик шартномаси унинг жамоасига бугунги кунда Ҳиндистонда ишлаб чиқарилган кўпгина фильмлар устида ишлаш имконини беради.
10. ?
Сизнингча, Болливуднинг 100 йиллик тарихидаги энг яхши 10 та актёрдан ким бу ўринни эгаллашга лойиқ?
Изоҳ (0)