АҚШ Миллий хавфсизлик кенгаши вакили Жон Кирби Шимолий Корея томонидан Россияга қурол-яроқ етказиб берилишини “хавотирли” деб атади.
Оқ уй исбот сифатида Шимолий Кореяда экани айтилган омбордаги ўқ-дорилар партияси суратини эълон қилган. Снарядлар Россия байроғи остида сузган кемага юкланган, кейин эса мамлакатнинг жануби-ғарбий чегарасидаги омборга етказилган. АҚШ маълумотларда кўра, КХДР 7 сентябрдан 1 октябрга қадар ҳарбий ўқ-дорилар ортилган 1000 дан ортиқ контейнерни юборган.
“Биз КХДРни Украина шаҳарларга ҳужумлар, тинч аҳолининг ўлдирилиши ва ноқонуний урушнинг давом эттирилишига хизмат қиладиган ҳарбий техникаларни Россияга етказиб бераётганини қоралаймиз”, — дейди Кирби.
Россия ва КХДР ўртасида юк ташувлари ҳажми кескин ошгани ҳақида аввалроқ Beyond Parallel таҳлилий лойиҳаси ёзганди. Сунъий йўлдошлардан олинган суратлар таҳлили ҳам бундан далолат бермоқда. Масалан, КХДРнинг Россия била билан чегарасидаги Туманган темирйўл пунктида 73 та юк вагони қайд этилган.
Шимолий Корея етакчиси Ким Чен Ин сентябрь ойи ўрталарида Россияда қарийб бир ҳафталик ташриф билан бўлди. Сафари давомида у Путин билан учрашди, Россиянинг илғор авиатехнологиялари билан танишди.
Изоҳ (0)