“Дадам тушимда келиб, оёғимга этик кийдириб кетган”. Малика Равшанова болалигида онаси билан бошдан кечирган қийинчиликлари ҳақида (видео)

Хонанда Малика Равшанова “Ўзимизнинг гап” кўрсатувига берган интервьюсида болалигидаги қийинчиликлар, онаси билан оғир кунларни бошдан кечиргани ҳақида гапириб берди.

“Кечирмаган инсонларим қаторида энг яқинларим бор”

— Кечиролмаганларим бегона бўлганида бунчалик қалбим яраланмас эди. Бироқ кечирмаган инсонларим қаторида ўзимнинг энг яқинларим бор. Дадам ўтган кундан бошлаб, етимларнинг ҳаққини талон-тарож қилишган, уларни кечира олмайман. Етимнинг ҳаққи ҳеч қачон ҳеч кимда қолиб кетмайди. Бу нарса бизни тез улғайтирди.

“Мактабга сумка ўрнига пакет тутиб борганман”

— Дунёда ёмон она бўлмайди. Боласига кимдир нимадир қилса биринчи куйиб ёнадиган она бўлади. Онамнинг кўп вақти пул ишлаб топишга кетарди. Гилам тўқирди, кашта тикарди, нон ёпарди, тикувчилик қиларди. У эрта саҳар олтида кетиб, кечки олтида қайтарди. Кузда мактаб учун керакли нарсаларни олиб берай, деб ёзда ишларди. Ҳаракат қиларди, бир сафар ишлаб менга, кейин акамга ўқув-қурол олиб берарди. Аммо бир сафар сумка олиб беролмай, “Дафтарларни пакетга солиб бориб туринглар”, деган.

“Дадам тушимда олдимга келиб, оёғимга этик кийдириб кетган”

— Бир йили қиш қаттиқ келди, қор, ёмғир ёғди. Оёғимда этик йўқ эди, бола пули берилмасди, кейин онам пакет кийиб борасанми, деб ўйланган. Этигимдан сув ўтаётган бўлса ҳам мактабга борсам бўлди, деб кийиб бораверганман. Ўшанда дадам тушимга кирганди. У олдимга келиб, оёғимга этик кийдириб кетган. Ўша пайтда бола бўлсам ҳам этигим йўқ, деб хафа бўлмаганман. Ҳозир ўйлаб кўрсам, онамга осон бўлмаган экан, — дейди хонанда Малика Равшанова.