“Ёмғир” қўшиғи билан мухлислар эътиборига тушган хонанда Анвар Жўраев концерти олдидан берган интервьюсида шахсий ҳаёти ва хорижда ижод қилишининг сабаблари ҳақида гапирди.
— Баъзан ортда қолган йилларга қараганимда, ижодни энди бошлаган пайтларимиз ёдимга тушади. У пайтда оддий, ёш бола бўлганмиз. Гитарачи ўртоғим билан мусиқий сайқалчининг олдига бориб, “Қайси қўшиқни ёзайлик”, деб маслаҳат қилардик. Айнан ўша “Ёмғир” қўшиғи 25 йилдан буён ташриф қоғозимизга айланди. Эски таркибдаги дўстларим билан муносабатларимиз сақланиб қолган. Улар Тошкентда яшайди, ҳали ҳам кўришиб, гаплашиб турамиз. Аммо улар санъатдан кетиб, ресторан бизнеси билан шуғулланади. Сизларга кичик бир сирни айтаман — концертда улар ҳам қатнашади. Чунки “Саҳар”нинг 25 йиллик юбилей концертида улар ҳам иштирок этиши керак, дейди Анвар Жўраев.
Анвар Жўраев бир муддат Қозоғистонда ижод қилгани ва Ўзбекистонга қайтиб келишининг сабаблари ҳақида гапирди
— Қайтишимга Ўзбекистондаги атмосферанинг ўзгаргани сабаб бўлди. 2017—2018 йилда келганимда ҳамма нарса қанақадир эркин ва озод бўлганлигини сездим. Ўзимга ўзим “Энди қайтиб, яна бир ҳаракат қилиб кўраман”, дедим. Бошқача муҳит сезилди, озодликни сездим. Менда-ку аввал ҳам қандайдир чекловлар бўлмаган. Аммо тизим бутунлай бошқача эди. “Ўзбекнаво” бўларди, қанақадир тадбирларга кимнингдир жияни, қизи ёки ўғлининг тўйига бепулга юборишарди. Ҳозир ҳаммаси ўзгарган санъаткор борган тадбиридан ҳақ оляпти. Аслида ҳам меҳнатига яраша пул тўланиши керак, дейди Анвар Жўраев.
Хонанда икки марта омадсиз никоҳга учрагани ва тўнғич қизи унинг касбини танлагани ҳақида гапирди
— Инсон ҳаётида ҳар хил муносабатларни бошдан кечирар экан. Афсуски, уларнинг ҳаммаси ҳам омадли бўлавермайди. Икки марта ажрашгандим, ҳозир учинчи аёлим билан яшаяпман. Энди кимдир биринчи уринишдаёқ бахтли бўлади, кимдир эса қийинчиликларга дуч келади. Муносабатлар пайтида иккала томон ҳам айбдор эканини тан олиш керак. Илк турмушимдан қиз, ундан кейингисидан ўғил фарзанд кўрганман. Ҳозирги аёлим эса ўғил ва қиз фарзандларни дунёга келтирган — улар ҳали жуда кичкина.
Биринчи аёлим билан дўстона муносабатдамиз, аммо кейингиси билан ундай деёлмайман. Оммага чиқиб, ҳар хил гапларни қилди, бу билан фақат ўзи ва менинг обрўйимни тўкди холос. Тўнғич фарзандимни ўзим билан тадбирларга, студияларга олиб борардим. У баъзан диванда ухлаб қоларди, шу тариқа унда санъатга қизиқиш пайдо бўлди. Ҳозир у Олмаотадаги Карим Сарсоев номидаги санъат коллежида таълим олади. Келаси йил Ўзбекистон давлат консерваториясига ўқишга топширади. У Қозоғистонда кўплаб ютуқларга эришди, халқаро танловларда иштирок этди. Ундан умидларим катта, дейди Анвар Жўраев.
Изоҳ (0)