Ўзбек шоу-бизнеси оламида ўз ўрнига эга бўлишига қарамай турли сабабларга кўра санъатда маълум муддат танаффус қилиб ижод қилишдан четлашган санъаткорлар ҳам бор. Уларнинг айримлари шу танаффусдан кейин санъатни тарк этганини эълон қилса, айримлари яна муваффаққиятга эришади ва улар куйлаган тароналар миллионлаб мухлисларнинг қалбини забт этади.
Музаффар Абдуазимов
Хонанда Музаффар Абдуазимов Ўзбекистон Давлат санъат ва маданият институтининг Оммавий тадбирлар режиссураси факультетида таҳсил олган. Болалигидан санъатга қизиқа бошлаган хонанда 1991—1992 йилларда устоз санъаткорларнинг қўшиқларини ҳаваскор сифатида куйлаб юрган. Ўзининг илк ижодини эса 1997 йил «Келинчак» қўшиғи билан бошлайди.
Унинг ижодидаги энг хит тароналардан бири 2000 йилда ижро этган «Оҳ дейман» таронаси ҳисобланади. «Дард», «Галди қалам қошли ёр» қўшиқлари ҳам мухлисларнинг қалбидан жой олди. Музаффар Абдуазимов 2016 йилга қадар ижоддан тўхтамади ва шу йилнинг сўнггида касбий танаффус эълон қилди. У 2021 йил ижодга қайтди ва янги тароналар устида ишлай бошлади ва хонанданинг 2022 йилда мухлисларига тақдим этган «Онам, касалман деманг» номли таронаси хит даражасига чиқди. Ижодкор ҳозирда бу қўшиғини турли хил шодиёналарда ижро этади. Ушбу таронага ишланган видеоклип эса YouTube’да ҳозирга қадар 5 миллионга яқин кўришлар сонига эга.
Мустафо
Мустафо тахаллуси билан ижод қилаётган хонанда Зоҳид Юсупов 1984 йил 23 сентябрь куни Тошкент шаҳрида таваллуд топган. Мактабни тугатганидан сўнг у санъаткор Алишер Рўзметовга шогирд тушади ва хонандалик сирларини ўрганади. Мустафонинг илк таронаси 2009 йилда куйланган «Бизни ёр кичкинадир» таронаси ҳисобланади. Шу орада у Сардор Раҳимхонга мусиқадан сабоқ олади. Ўша йилларда хонанданинг «Аразчи хоним» қўшиғи хитга айланади. Бундан ташқари «Олма-олма» ҳамда «Самолёт» қўшиқлари ҳам хит тароналар сафига киради. Хонанда 2020 йилдан кейин ижодий танаффус қилади, шундан кейин унинг 2022 йилда мухлисларига тақдим этган «Қироличам» таронаси хит даражасига чиқди. Таронага ишланган видеоклип YouTube’да ҳозирга қадар 3 миллиондан ортиқ кўрилган.
Анвар Жўраев (Саҳар гуруҳи)
Хонанда Анвар Жўраев 1999 йилда «Саҳар гуруҳи»ни гуруҳини тузади. Кейинчалик гуруҳнинг «Мени излама», «Ёмғир» тароналари хит даражасига чиқади ва миллионлаб мухлисларнинг қалбидан жой олади. Анвар Жўраев 2004 йилда ўз гуруҳи билан ижод қилиш мақсадида Қозоғистонга боради. Кейинчалик Ўзбекистонга қайтган «Саҳар» гуруҳи 2009 йилда мусиқий альбомини мухлисларига тақдим этади ва шундан кейин ижодий танаффус эълон қилади. Гуруҳ томонидан 2022 йилда «Унутганим йўқ» таронаси тақдим этилади ва бу мусиқа тез орада хит даражасига чиқади.
Жаҳонгир Отажонов
Жаҳонгир Отажонов санъаткорлар оиласида таваллуд топган. Амакиси Ортиқ Отажоновдан мусиқа сирларини ўрганган хонанда 1-синфидан пойтахтдаги Глиэр номидаги мусиқа мактабига ўқишга боради. Мактабни битирганидан сўнг эса Ўзбекистон давлат консерваториясини битиради. Жаҳонгир Отажонов ижодидаги «Аразламанг» «Оқ кабутарлар» ва «Доғман» тароналари хит дадаржасига чиққан. Хонанданинг ижодида бир муддат хит қўшиқлар кўзга ташланмади. У 2018 йилда «Қадди баланд» таронасига ишланган клипни мухлисларига намойиш этади. Ушбу тарона тез фурсатда хит даражасига чиқади ва мухлислар томонидан эътироф этилади. «Қадди баланд» таронасига ишланган видеоклип YouTube’да ҳозирга қадар 5 миллион марта кўрилган.
Дилдора Ниёзова
Хонанда Дилдора Ниёзова санъатнинг эстрада йўналишидаги ижодини 2000 йилда бошлаган. Болалигида Ўзбекистон халқ артисти Юлдуз Усмонованинг ашаддий мухлиси бўлган ва унинг қўшиқларини ижро этиб юрган. Дилдора Ниёзова ижросидаги «Ишонма» ва «Олма» тароналари хит бўлган. Хонанда 2018 йилда «Армон бўлди» номли хит таронаси билан ижодга қайтади. Ушбу тарона кўплаб мухлисларнинг қалбидан жой олган. «Армон бўлди» таронасига ишланган видеоклип YouTube’да ҳозирга қадар 26 миллон марта кўрилган.
Зоҳиршоҳ Жўраев
Хонанда Зоҳиршоҳ Жўраев ёшлигидан санъат соҳасига қизиққан ва отасидан мусиқа сирларини ўрганган. Хонанда ижодга кириб келганидан сўнг «Менми ўшал», «Юрагимдасан», «Мани дея» каби тароналарини мухлисларига ҳавола этган. Зоҳиршоҳ Жўраев 2013 йилда «Мани дея» таронасига ишланган видеоклипни намойиш этади ва шундан кейин унинг ижодида сокинлик кузатилган. Хонанда 2017 йилда «Яхши кўриб қолдимда» номли таронаси билан ижодга қайтади ва ушбу тарона чиққанидан сўнг миллионлаб мухлисларнинг қалбидан жой олади. Ушбу таронага ишланган видеоклип YouTube’да 13 миллиондан ортиқ кўришлар сонига эга. Шундан кейин унинг ижросидаги «Дилозорим», «Сени соғиниб», «Севдим» номли тароналар мухлисларга тақдим этилди.
Равшан Собиров
Дастлаб «Болалар» гуруҳининг аъзоси, кейинроқ яккахон хонанда сифатида танилган Равшан Собиров 2000 йилда ижодининг чўққисига чиқди ва унинг тароналари миллионлаб мухлисларнинг қалбидан жой олди. Хонанда ижро этган «Сен йиғлама», «Нега айтгин», «Аскар» ва «Сетора» гуруҳи билан бирга куйлаган «Хайр мактабим» таронаси ўша даврнинг энг хит тароналари сафига кирган. Узоқ муддатли ижодий танаффусдан кейин Равшан Собировнинг «Соғиндим де» номли таронаси мухлисларига ҳавола қилинди ва тез орада хит даражасига чиқди.
Мавзуга доир:
- Дурдона Қурбонова ва Феруза Норматова, Шаҳзод Султонов ва Шоҳрух Ҳамдамов: Жиддий келишмовчилик сабаб бир фильмда суратга тушишни истамайдиган актёр ва актрисалар (видео).
- Мухлисни силтаб ташлаган Шоҳжаҳон Жўраев, томошабинга тарсаки туширган Алишер Узоқов: Санъаткорларни қандай ҳолатлар асабийлашишга мажбур қилади? (видео).
- Азиза Ниёзметова, Ҳошим Арслонов, Жамшид Зокиров ва саратондан вафот этган бошқа ўзбекистонлик санъаткорлар (фото).
- Бўйни йиртилган, оёғи синган: Суратга олиш жараёнларида жароҳат олган ўзбек шоу-бизнеси вакиллари (видео).
Изоҳ (0)