“Sahar” guruhi solisti Anvar Jo‘rayev to‘y va tadbirlardagi xizmati uchun qancha haq olishini yashirmaydi. Xonanda bloger Jahongir Latipovga bergan intervyusida ilk konsertini “bitta qo‘shiq bilan” o‘tkazishini va bokschi Mayk Tayson bilan qo‘shiq kuylagani haqida gapirdi.
— To‘y xizmatlari va tug‘ilgan kunga borib qo‘shiq aytib berishim — 1000 dollardan 1500 dollargacha. Qirq daqiqa yoki bir soatlik dastur asosida xizmat qilishim esa 2000 dollar bo‘ladi. Bir oyda bunday xizmatlar 30-40 ta va undan ham ko‘proq bo‘lishi mumkin.
— O‘zbekistonda san’atkorlar hozir asosan to‘ydan yaxshi daromad qilishi mumkin. YouTube, Instagram va musiqiy platformalar sekin-asta rivojlanib, ulardan ham kelasi 5-6 yillarda yaxshi pul topish mumkin bo‘lib qoladi. Musiqiy platformalardan oyiga uncha ko‘p daromad tushmaydi — o‘rtacha 500-1000 dollar bo‘ladi. San’atkorlar to‘y va tadbirlardan tashqari biznes bilan shug‘ullanishi mumkin — kimdir moda yo‘nalishida, boshqa birov restoran ochadi. Hozir shaxsiy biznesim yo‘q, lekin yaqin orada musiqa bilan hamohang bo‘lgan qahvaxona ochmoqchiman.
Anvar Jo‘rayev Mayk Tayson bilan qo‘shiq kuylagan
— Qozog‘istonning Ostona shahrida kinofestival bo‘lganda bokschi Mayk Tayson mehmon bo‘lib kelgandi, men ham qo‘shiq aytish uchun borgandim. U bilan suratga tushgim kelgan-u, ammo nima deb yoniga borishni bilmay turgandim. Birozdan so‘ng sahnada inglizcha qo‘shiq aytishni boshlaganman. U Taysonning sevimli qo‘shig‘i ekan, o‘rnidan turib olib sahnaga chiqib men bilan qo‘shilib, shu ashulani kuylagan va tasvirchilarga bizni suratga tushirishni aytgan. Keyin mening stolimda birga o‘tirasizlar deb, o‘zi bilan olib o‘tirgan. Juda samimiy, quvnoq, kirishuvchan inson ekan, hurmatim yanada oshgan.
45 yoshida ilk konsertini berayotgan xonanda
— Ijtimoiy tarmoqlarda bittagina “Yomg‘ir” qo‘shig‘i bilan konsert beradimi, deb yozayotganlar bo‘lyapti. Ularga “Ha, ikki soat davomida faqat shu ashulamni aytaman”, deyman (kulib). Men tengi avlod vakillari qanday qo‘shiqlarim borligini yaxshi bilishadi. Jami 20 ta qo‘shiq aytaman — eskilari ham, yangilari ham bor. “Xalqlar do‘stligi”da konsert berish uzoq yillik orzum bo‘lgan, shu kun kelishiga ham oz qoldi, shukr.
Xonanda 25—26-dekabr kunlari ilk yakkaxon konsert dasturini taqdim etyapti. Chiptalar hali yetarli, narxi 30 mingdan 400 ming so‘mgacha belgilangan.
Izoh (0)