Xonanda Shakira sobiq eri Jerar Pike bilan ajrashish paytida xarid qilingan qimmatbaho mashinadan xalos bo‘lishga qaror qildi. U hayotida bo‘lib o‘tgan tushkunlik davrini eslatuvchi Lamborghini avtomobilini muxlislaridan biriga hadya qilmoqchi.
2022-yilda mahalliy telekanallardan biri xonandaga maxsus buyurtma asosida ishlab chiqarilgan binafsharang Lamborghini taqdim etgan. Endilikda xonanda sobiq turmush o‘rtog‘ini eslatib turadigan mashinadan qutulish uchun Instagram obunachilari orasida avtomobil lotereyasini o‘tkazmoqda.
“Men rasman mashinamni muxlislarimdan biriga sovg‘a qilmoqchiman. Avtomobilni eng yaxshi ko‘rgan odamlari bilan unutilmas lahzalarni o‘tkazishni istagan kishiga beraman”, deb yozdi Shakira tanlov haqidagi postga. Uning so‘zlariga ko‘ra, bu reklama emas va hech narsa sotib olishning hojati yo‘q. O‘yinda ishtirok etishning yagona sharti — bu ishtirokchilarning yoshi 18 ga yetgan bo‘lishi lozim.
Ma’lumot uchun, xonanda Shakira va “Barselona”ning sobiq futbolchisi Jerar Pike 2010-yilgi futbol bo‘yicha Jahon chempionati madhiyasiga aylangan Waka Waka (This Time for Africa) qo‘shig‘i uchun klip suratga olingandan so‘ng uchrashishni boshlagan. Uzoq muddatli munosabatlarga qaramay, ular rasmiy nikohda bo‘lmagan. Juftlik 2022-yilning yozida ajralishlarini e’lon qildi. Sobiq oshiqlar birgalikda Milan va Sasha ismli o‘g‘illarni tarbiyalab kelmoqda.
Izoh (0)